qer82021
Alzheimeri. Aprovohet bari i parë, pas 20 vjet dështimesh
FDA-ja ka ndezur dritën e gjelbër për barin kundër Alzheimerit aducanumab, i cili vjen pas njëzet vjet dështimesh në kërkimet në këtë fushë dhe rrit shpresat e miliona pacientëve në të gjithë botën, deri më tani të irrituar nga qindra pengesa në trajtimet e konsideruara premtuese. Sipas entit amerikan, i cili gjithsesi kërkoi një test të ri klinik, terapia e zhvilluar nga Biogeni ka potencialin për të ngadalësuar rrjedhën e sëmundjes. Një vendim i diskutueshëm duke pasur parasysh kundërshtimin e panelit të pavarur të ekspertëve të agjencisë dhe ekspertëve të tjerë të Alzheimerit se nuk ka prova të mjaftueshme për të treguar që bari mund t'i ndihmojë me të vërtetë pacientët.
Terapia konsiston në një injeksion intravenoz një herë në muaj, i cili në terapinë kundër Alzheimerit do të ndihmonte në ngadalësimin e rënies konjitive të pacientëve që janë në fazën fillestare të sëmundjes. Ky është trajtimi i parë që ndikon në rrjedhën e sëmundjes dhe nuk është i kufizuar në sulmimin e simptomave të demencës.
"Jemi të vetëdijshëm për vëmendjen që rrethon këtë aprovim - tha Patrizia Cavazzoni, e cila drejton Qendrën për Vlerësimin dhe Kërkimin e Barnave në FDA - Ne e dimë që terapia ka gjeneruar vëmendjen e shtypit, pacientëve dhe shumë palëve të interesuara". Me antitrupin monoklonal anti-Alzheimer të aprovuar në SHBA, "hapet një rrugë e re për pacientët dhe ky trajtim është më shumë se një shpresë: është terapia e parë që mund të parandalojë zhvillimin e sëmundjes", tha për "Adnkronos Salute" Gioacchino Tedeschi, President i Shoqatës Italiane të Neurologjisë (SIN). "Bari është i indikuar për njerëzit që kanë karakteristika që predispozojnë ndaj Alzheimerit dhe po flasim për njerëz mbi 65 vjeç, me depozita të proteinave amiloide në tru dhe një probabilitet të lartë për të zhvilluar një deficit konjitiv: në Itali, vlerësohet se në këtë kategori mund të futen 100-300 mijë njerëz", shton Tedeschi. "Pacienti duhet të zgjidhet me kujdes - paralajmëron presidenti i SIN-it - për një terapi mujore që kërkon një MRI, për të shmangur disa efekte anësore që mund të dëmtojnë sistemin nervor qendror, kështu që antitrupi monoklonal duhet të administrohet vetëm në qendrat e specializuara".
"Kjo është një arritje historike për komunitetet që kujdesen për pacientët me sëmundjen e Alzheimerit", komentoi Giuseppe Banfi, CEO i Biogen Italy. "Alzheimeri është një sëmundje delikate që prek trurin shumë vite para se të shfaqen simptomat e hershme. Për vite me radhë, shkenca ka kërkuar pa sukses gurin themelor për shërimin e kësaj patologjie. Më në fund, pas përpjekjeve të shumta nga shumë kompani dhe studiues, mund të themi se ekziston një shpresë konkrete për trajtimin e sëmundjes së Alzheimerit. Kërkimet na tregojnë se është e mundur të ndërhyhet në mënyrë të konsiderueshme për zvogëlimin e rënies konjitive dhe funksionale, por na tregon edhe se duhet të ndryshojmë një paradigmë kulturore të konsoliduar: duhet të ndërhyjmë herët dhe menjëherë, duhet të mbështesim sistemet shëndetësore në mënyrë që ato të jenë të gatshme të mirëpresin terapi të reja dhe është e nevojshme të edukojmë për parandalimin. Edhe për këtë, si gjithmonë, ne do të bëjmë pjesën tonë. Po presim prononcimin e agjencive të tjera rregullatore, duke përfshirë EMA-n, tek e cila e kemi dorëzuar dosjen tetorin e kaluar".