nën182019
Shtohen rastet e anoreksisë së hershme te fëmijët
Shifrat vjetore të rasteve të reja të anoreksisë nervore te fëmijët me moshë 8-12 vjeç në Mbretërinë e Bashkuar dhe në Irlandë, thuajse janë dyfishuar krahasuar me një vlerësim të vitit 2006, sipas një kërkimi të publikuar në "BMJ Open".
"Në vitin 2006, shkalla e incidencës së anoreksisë te fëmijët e kësaj grupmoshe të trajtuar në spital ose klinika të specializuara ishte rreth 1.5 në 100,000 të rinj, ose, duke përfshirë edhe çrregullime të tjera të të ngrënit që tani mund të përfshihen në diagnozën e anoreksisë nervoze, prej 2.1 në 100,000 vetë. Të dhënat tona tregojnë përkundrazi që shifra është rritur në 3.2 për 100,000 fëmijë", shpjegon Hristina Petkova (Instituti i Psikiatrisë, Psikologjisë dhe Neuroshkencës në Londër), autore kryesore e punimit. Për të llogaritur shkallën e incidencës, studiuesit përdorën të dhëna nga raportet mujore të specialistëve të mbledhura në Sistemin e Mbikëqyrjes së Psikiatrisë së Fëmijëve dhe Adoleshentëve. Gjatë një periudhe tetë-mujore në vitin 2015, u diagnostikuan 305 raste të reja, shumica gra të reja (91%), banorë në Angli (70%) dhe me përkatësi etnike të bardhë (92%). Bazuar në këto shifra, studiuesit llogaritën një normë vjetore të incidencës nga 26 për 100,000 vajza dhe 2 për 100,000 djem, me një normë të përgjithshme prej 14 rastesh të reja për çdo 100,000 djem të moshës 8 deri në 17 vjeç. Norma e rasteve të reja u rrit në mënyrë të qëndrueshme me moshën, duke arritur një kulm në moshën 15-vjeçare te femrat dhe 16-vjeçare te meshkujt, me rënie të mëvonshme dhe të konsiderueshme në moshën 17 vjeçare. Për fëmijët midis moshës 8 dhe 12 vjeç, incidenca ishte 3.2 në 100,000, me normën 4 në 100,000 për fëmijë 11 vjeç dhe 12 në 100,000 për fëmijë 12 vjeç.
"Hulumtimi i ardhshëm duhet të vlerësojë zhvillimin e ndërhyrjeve të hershme, duke pasur parasysh incidencën në rritje te fëmijët më të vegjël", thotë Petkova. Autorët theksojnë se ky studim është i gjerë dhe përfaqësues në nivel kombëtar, megjithëse sigurisht i mungojnë disa të dhëna, siç janë ato të të rinjve që kontrollohen vetëm nga mjekët e përgjithshëm dhe fakti nëse rezultatet mund të jenë të zbatueshme për vendet e tjera me të ardhura të larta.
BMJ Open 2019. Doi: 10.1136/bmjopen-2018-027339
http://dx.doi.org/10.1136/bmjopen-2018-027339