gus22022
Ekspozimi prenatal ndaj çrregulluesve endokrinë është i lidhur me steatozën hepatike jo alkolike
Sipas një studimi të botuar në JAMA Network Open, rritja e incidencës së steatozës hepatike jo alkolike te fëmijët lidhet me ekspozimin prenatal ndaj disa kimikateve që dëmtojnë sistemin endokrin. Çrregulluesit endokrinë përkufizohen si një klasë e gjerë ndotësish mjedisorë që përfshijnë pesticide, plastikë dhe metale toksike, të tilla si: substancat perfluoroalkil (PFAS), të përdorura në enët e gatimit që nuk ngjitin.
"Ne të gjithë jemi të ekspozuar ndaj këtyre substancave në baza ditore përmes ushqimit që hamë, ujit që pimë dhe përdorimit të produkteve të konsumit. Ky është një problem serioz i shëndetit publik", tha autori kryesor i studimit Damaskini Valvi (Icahn School of Medicine, Mount Sinai Nju Jork). Këto substanca ndërhyjnë në sistemet hormonale dhe metabolike, dhe disa studime eksperimentale kanë treguar se ato mund të shkaktojnë dëmtim të mëlçisë dhe steatozë hepatike jo alkolike; megjithatë, efektet e mundshme të ekspozimit prenatal ndaj këtyre kimikateve nuk janë vlerësuar te njerëzit deri më tani.
Në këtë studim, studiuesit matën 45 kimikate në gjakun ose urinën e 1,108 grave shtatzëna në periudhën 2003-2010, të regjistruara në projektin Human Early-Life Exposome, një rrjet bashkëpunues i gjashtë studimeve prospektive të bazuara në popullatë të kryera në: Francë, Greqi, Lituani, Norvegji, Spanjë dhe Britani.
Kur fëmijët arritën moshën 6-11 vjeç, ekspertët matën nivelet e enzimave dhe citokeratinë-18, tregues të rrezikut të sëmundjes hepatike në gjakun e fëmijëve, duke gjetur vlera të larta tek ata, nënat e të cilëve kishin qenë më të ekspozuara ndaj kimikateve gjatë shtatzënisë. Kufizimi kryesor i këtij studimi ishte pamundësia e kryerjes së një biopsie të mëlçisë, e konsideruar si standardi i artë për vendosjen e një lidhjeje shkakësore me steatozën hepatike jo alkolike, edhe për shkak të kufijve etikë të vendosur nga mosha e fëmijëve. "Megjithatë, rezultatet tona tregojnë se ekspozimi i hershëm ndaj shumë kimikateve që çrregullojnë gjendjen endokrine është një faktor rreziku për steatozën hepatike jo alkolike pediatrike dhe theksojnë nevojën për hetime të mëtejshme për të sqaruar se si ekspozimet kimike mjedisore mund të ndërveprojnë me faktorët gjenetikë dhe të stilit të jetesës në patogjenezën e sëmundjes hepatike", përfundon Valvi.
JAMA Network Open
https://jamanetwork.com/journals/jamanetworkopen/fullarticle/2793915