sht292017

Tumori i fshikëzës, nis studimi i fazës 1 me paclitaxel dhe acid hialuronik

Instituti klinik Humanitas dhe Fidia Farmaceutici në Itali njoftojnë nisjen e një studimi të fazës 1 mbi administrimin e Oncofid-P-B (të përbërë nga paclitaxel dhe acidi hialuronik) te pacienti i parë i prekur nga karcinoma e fshikëzës in situ (Cis) që nuk reagon ndaj trajtimit me Bcg. Ky studim, shpjegon një komunikatë, është projektuar për të vlerësuar sigurinë, tolerancën, profilin farmakokinetik dhe aktivitetin anti-tumoral të një skeme të re të trajtimit intensiv. Pacienti i parë është regjistruar pranë Spitalit Humanitas të Rozzano, Qendra Koordinuese e studimit dhe në të ardhmen është parashikuar përfshirja e qendrave të tjera spitalore kombëtare dhe europiane. Oncofid-P-B është eksperimentuar tashmë në pacientë më tumor të fshikëzës duke treguar një profil efikasiteti dhe sigurie të favorshëm.
"Jemi entuziastë për fillimin e këtij eksperimenti klinik të fazës I: bëhet fjalë për studimin e parë që përdor një skemë trajtimi novatore me Oncofid-P-B, aplikimi i të cilit është bërë i mundur falë thjeshtësisë së përdorimit dhe profilit favorizues të sigurisë së produktit" deklaron Dr. Rodolfo Hurle, kërkuesi kryesor pranë Spitalit Humanitas. "Falë Oncofid-P-B është e mundur që të reduktojmë riskun e cistektomisë te pacientët me tumor të fshikëzës që nuk reagojnë ndaj Bcg, për të cilët opsionet terapeutike janë gjithashtu të pakta ose nuk ka fare. Ky studim i fazës 1 do të na lejojë që të përftojmë informacione të tjera mbi sigurinë, tolerancën dhe efikasitetin e Oncofid-P-B për këtë patologji tumorale të ashpër".
"Oncofid-P-B është një konfirmim i radhës për angazhimin konstant të Fidias për kërkimin dhe zhvillimin e barnave me acid hialuronik gjithmonë e më efikase e të sigurta", deklaron Carlo Pizzocaro, President i Fidia Farmaceutici. "Kjo nismë në bashkëpunim me qendrat spitalore të avancuara mund t'i ofrojë pacientëve të prekur nga karcinoma e fshikëzës, që kanë dështuar ndaj trajtimeve farmakologjike aktuale, një mundësi terapeutike". Në një studim të publikuar më parë, kryer në 16 pacientë të prekur nga e njëjta patologji, Oncofid-P-B është administruar një herë në javë për 6 javë rresht me doza që variojnë nga 150 në 750 mg dhe nuk është përcaktuar asnjë toksicitet dozë-limitues për asnjë nga dozimet e vlerësuara. Përqendrimi plazmatik i produktit ka rezultuar gjithmonë nën limitin minimal të zbulimit për të gjithë dozimet e testuara dhe 9 pacientë (56%) janë përgjigjur plotësisht ndaj trajtimit.