qer152022
Insuficienca kardiake. Një hap përpara falë rezonancës magnetike
Një studim i ri i koordinuar nga Universiteti Sheffield në Britani ka hetuar përdorimin e rezonancës magnetike kardiake (CMR) në rastet e insuficiencës kardiake.
Analizat treguan se te pacientët me insuficiencë të dyshuar kardiake, CMR-ja mund të përdoret për të vlerësuar presionin e mbushjes së ventrikulit të majtë (LVFP) dhe për të parashikuar ngritjen e tij. CMR-ja ishte superiore ndaj ekokardiografisë transtorakale, teknikës që përdoret më shpesh për shkak se nuk është invazive. Në fakt, metoda më e mirë për diagnostikimin e insuficiencës kardiake bazohet në teknikat e përdorimit të kateterëve kardiakë, për të cilët kërkohen alternativa. "CMR-ja ka rezultuar një mjet i rëndësishëm imazherie për të sqaruar etiologjinë e insuficiencës kardiake dhe nën-fenotipizimin e mëtejshëm. Avantazhi kryesor i CMR-së është saktësia e saj e avancuar në vlerësimin funksional dhe vëllimor. Aktualisht, nuk ka asnjë model CMR-je që përfshin LVFP-në. Është gjithashtu e paqartë nëse një model i tillë CMR-je mund të ofrojë përfitime prognostike", thuhet në European Heart Journal.
Studimi përfshiu 835 pacientë me moshë mesatare 65 vjeç, të cilët iu nënshtruan kateterizimit të zemrës së djathtë dhe CMR-së. Studiuesit fillimisht vendosën parametrat e nevojshëm, vëllimin atrial dhe masën e ventrikulit të majtë, në grupin kryesor (708 pacientë) dhe më pas zhvilluan një ekuacion të aftë për të llogaritur presionin kapilar pulmonar (PCWP), i cili u aplikua më pas në grupin e validimit (127 pacientë).
"Ne kemi treguar se rezonanca magnetike kardiake është superiore ndaj ekokardiografisë në parashikimin e presionit në brendësi të zemrës. Pothuajse 71% e pacientëve, presioni i gjakut të të cilëve iu mat gabimisht me ekokardiografi, rezultuan të kishin matje të sakta nëpërmjet rezonancës magnetike kardiake", shpjegoi Pankaj Garg, autori kryesor i studimit.
Për më tepër, PCWP-ja në modelin CMR duket se ka një ndikim prognostik. Analizat tregojnë lidhjen e saj me një rrezik të shtuar për vdekje. "Ekuacioni i thjeshtë diagnostikues është shumë i dobishëm klinikisht dhe do t'i ndihmojë mjekët të parashikojnë presionin e zemrës dhe të diagnostikojnë insuficiencën kardiake", tha Andrew J Swift, bashkautor i studimit. "Hapi tjetër është testimi i përdorimit të ekuacionit në spitale të tjera për të verifikuar përfitimin për pacientët dhe për të zvogëluar nevojën për teste invazive", përfundoi autori.
Eur Heart J 2022. Doi: 10.1093/eurheartj/ehac207.
https://www.doi.org/10.1093/eurheartj/ehac207