mar62017

Diabeti tip 2, një terapi e re përmirëson kontrollin glicemik

Artikuj lidhur

18-09-2023 | Kontrolli i diabetit te pacientët në politerapi. Krahasohen empagliflozina dhe insulina

25-08-2023 | Diabeti. Reduktimi i karbohidrateve ndihmon në menaxhimin e glicemisë

18-08-2023 | Diabeti 2. Kirurgjia bariatrike, më efektive se terapia e zakonshme

Kombinimi në raport fiks i titrueshëm i insulinës glargine 100 Unità/mL dhe agonistit të receptorit të GLP-1, lixisenatide, në monoadministrim ditor, ka marrë autorizimin për t'u tregtuar në Evropë. Lajmin e ka komunikuar Sanofi që saktëson se Suliqua (emri i barit) është autorizuar për trajtimin e të rriturve me diabet tip 2, për të përmirësuar kontrollin glicemik në kombinim me metforminën, kur metformina vetëm ose në kombinim me një tjetër bar antidiabetik oral apo me insulinën bazale nuk arrin të kontrollojë siç duhet gliceminë.

Vendimi i Komisionit Evropian për ta autorizuar mbështetet në rezultatet e dy studimeve klinike të fazës 3 (LixiLan-O) dhe (LixiLan-L), ku u regjistruan mbi 1.900 pacientë me diabet tip 2 në të gjithë botën, për të vlerësuar efikasitetin dhe sigurinë e këtij kombinimi në raport fiks në një popullatë pacientësh të kontrolluar shumë pak me antidiabetikë oralë (LixiLan-O)  ose insulinë bazale (LixiLan-L).

Suliqua ka treguar një reduktim të hemoglobinës së glikuar (HbA1c) statistikisht superior ndaj lixisenatide (-0.8%, p<0.0001) dhe insulinës glargine 100 Unità/mL (-0.3%, p<0.0001) në studimin LixiLan-O. Të njëjtin rezultat ka pasur në krahasim me insulinën glargine 100 Unità/mL (-0.5%, p<0.0001) në studimin LixiLan-L. Bari do të jetë i disponueshëm në dy lloje penash pre-filled (SoloSTAR) të cilat do të japin opsione të ndryshme dozimi për t'iu përgjigjur më mirë nevojave të pacientëve.

Diferenca mes dy penave qëndron në nivelin e dozimit të dy barnave dhe në proporcionin e tyre: Suliqua SoloSTAR 10-40  përmban nga 10 në 40 njësi insulinë glargine në kombinim me doza 5 - 20 mikrogramëshe lixisenatide. Pena SoloSTAR 30-60 përmban 30 - 60 njësi insulinë glargine në kombinim me doza 10 - 20 mikrogramëshe të lixisenatide.

"Suliqua përfaqëson një terapi novatore që mund t'i përgjigjet nevojave të rëndësishme të paplotësuara të personave me diabet tip 2 në Evropë, - komenton Elias Zerhouni, president i R&D i Grupit Sanofi. - Aprovimi i këtij bari është suksesi  i një përpjekjeje të përbashkët të kërkuesve për të kombinuar dy trajtime injektuese në një formulim të vetëm të titrueshëm. Tregtimi në Evropë do të nisë në gjysmën e dytë të 2017-s, në 28 shtetet anëtare të BE-së si dhe në Islandë, Lihtenshtajn dhe Norvegji".