dhj312020
Mikrobiota intestinale dhe diabeti. Përbërja e saj është përgjegjëse për zhvillimin e sëmundjes
Ndryshimet në përbërjen e mikrobiotës intestinale mund të dëmtojnë metabolizmin e aminoacidit histidinë, i cili nga ana tjetër shkakton një prodhim të shtuar të imidazol propionatit, molekulës që i bën qelizat e trupit rezistente ndaj insulinës në diabetin e tipit 2. Kështu dëshmon studimi MetaCardis, rezultatet e të cilit janë publikuar në "Nature Communications".
"Studimi ynë tregon qartë se imidazol propionati është i rritur në diabetin e tipit 2. Studimi gjithashtu tregon se nivelet e imidazol propionatit mund të ngrihen edhe para se të vendoset diagnoza e diabetit, pra, gjatë asaj periudhe që njihet si prediabet. Kjo mund të tregojë që imidazol propionati mund të kontribuojë në përparimin e sëmundjes", thotë Fredrik Bäckhed, nga Universiteti i Gothenburgut, autori kryesor i punimit.
Studiuesit studiuan të dhënat e 1,990 njerëzve nga Danimarka, Franca dhe Gjermania, duke vënë re se pacientët me diabet të tipit 2 dhe prediabet kishin nivele të rritura të imidazol propionatit në gjakun e tyre, në krahasim me kontrollet e shëndetshme. Për më tepër, ata vunë në dukje se nivelet e imidazol propionatit ishin të larta në subjekte me varfëri të shtameve bakteriale intestinale dhe me enterotip të Bakteroideve 2, faktorë që në të shkuarën ishin lidhur me mbipeshën. Enterotipi i Bakteroideve 2 ka qenë gjithashtu i lidhur me një shtim të gjeneve të përfshira në biosintezën e imidazol propionatit, nisur nga histidina dietike.
Meqenëse pacientët dhe kontrollet nuk kishin ndryshime pas futjes së histidinës përmes dietës, nivelet e ngritura të imidazol propionatit në diabetin e tipit 2 ka të ngjarë të pasqyrojnë metabolizmin e histidinës së dëmtuar në mikrobiomën intestinale. Për këtë arsye, ekspertët besojnë se mikrobiota mund të kontribuojë në diabetin e tipit 2 duke gjeneruar imidazol propionat, i cili nga ana tjetër, mund të modifikojë inflamacionin.
"Ne kemi pasur mundësi të analizojmë gati 2,000 mostra dhe për këtë arsye, mund të përcaktojmë se nivelet e ngritura të imidazol propionatit mund të lidhen me diabetin e tipit 2. Meqenëse nivelet janë gjithashtu të ngritura në prediabet, mendojmë se imidazol propionati, në disa raste, mund të shkaktojë edhe sëmundjen", përfundojnë autorët.
Nature Communications 2020. Doi: 10.1038/s41467-020-19589-w
https://doi.org/10.1038/s41467-020-19589-w