mar222022
Sezonet alergjike po zgjaten, për shkak të ndryshimeve klimatike
Sipas një studimi të publikuar në Nature Communications, sezonet alergjike ka të ngjarë të zgjasin dhe të bëhen më intensive për shkak të rritjes së temperaturave nga ndryshimet klimatike. Sipas Fondacionit Amerikan të Astmës dhe Alergjisë, 30% e të rriturve dhe 40% e fëmijëve në Shtetet e Bashkuara kanë alergji. Simptomat e alergjive variojnë nga problemet e lehta të acarimit, të tilla si lotimi i syve, teshtitja ose skuqja e lëkurës, deri te situatat më serioze, si vështirësia në frymëmarrje ose anafilaksia. Bari dhe pemët që prodhojnë polen ndikohen nga ndryshimet klimatike dhe rritja e temperaturave mund të bëjë që ato të aktivizohen më shpejt sesa janë aktivizuar historikisht. Temperaturat më të ngrohta mund të rrisin gjithashtu sasinë e polenit të prodhuar. "Alergjitë respiratore të shkaktuara nga poleni po përkeqësohen me ndryshimin e klimës. Shpresoj që rezultatet tona të jenë një pikënisje për shqyrtime të mëtejshme mbi pasojat e ndryshimit klimatik në polen dhe efektet e tij në shëndet", thotë Yingxiao Zhang, nga Universiteti i Miçiganit, Shtetet e Bashkuara, emri i parë i studimit.
Studiuesit kanë zhvilluar një model parashikues që shqyrton 15 nga llojet më të zakonshme të poleneve dhe se si do të ndikohet prodhimi i tyre nga ndryshimet e parashikuara të temperaturave dhe reshjeve. Ekspertët kombinuan të dhënat klimatike me skenarët socio-ekonomikë, duke korreluar modelin e tyre me të dhënat nga viti 1995 deri në vitin 2014. Analiza e të dhënave tregoi se, deri në fund të këtij shekulli, emetimet e polenit mund të fillojnë 40 ditë më herët në pranverë krahasuar me atë që ndodhi në periudhën 1995-2014 dhe se, për shkak të ngritjes së temperaturave dhe niveleve të CO2, sasia vjetore e polenit të emetuar çdo vit mund të rritet deri në 200%. Autorët theksojnë se modeli i tyre mund të përdoret për të bërë parashikime rreth sezonit të alergjive në rajone të ndryshme gjeografike. "Ne shpresojmë ta përfshijmë modelin tonë të emetimit të polenit në një sistem kombëtar të parashikimit të cilësisë së ajrit për t'i ofruar publikut parashikime më të mira dhe të ndjeshme klimatike", përfundojnë ekspertët.
Nature Communications 2022. Doi: 10.1038/s41467-022-28764-0
http://doi.org/10.1038/s41467-022-28764-0