qer232022
Konsumi i tepërt i kripës gjatë shtatzënisë mund të shkaktojë sëmundje kardiovaskulare te pasardhësit
Sipas një studimi të botuar në Gynecology and Obstetrics Clinical Medicine, dietat e pasura me kripë mund të shkaktojnë hipertension dhe sëmundje kardiovaskulare te gratë shtatzëna, si dhe të nxisin presionin e lartë të gjakut dhe të rrisin ndjeshmërinë ndaj hipertensionit te pasardhësit e tyre. "Dietat e pasura me kripë janë shkaku kryesor i vdekjeve në mbarë botën dhe mund të çojnë në sëmundje kardiovaskulare. Meqenëse e dimë se marrja ditore e kripës në Kinë mbetet e lartë, ne përdorëm një model miu për të eksploruar ndikimin e dietës së pasur me kripë të një nëne të ardhshme te pasardhësi i saj", shpjegon Jingsi Chen, bashkautor i studimit (Universitetit Mjekësor Guangzhou, Kinë).
Studiuesit studiuan minjtë shtatzënë në tre grupe të veçanta të cilët u ushqyen me një dietë që përmbante tre përqendrime të ndryshme kripe (të lartë, normal dhe të ulët). Për të eksploruar efektet e një diete të pasur me kripë të nënës në hipertension, studiuesit monitoruan presionin e gjakut dhe nivelet e proteinave në urinë si të nënave ashtu edhe të pasardhësve të tyre. Ata zbuluan se presioni i gjakut i pasardhësve me ekspozim të lartë të kripës gjatë shtatzënisë ishte më i lartë se ai i pasardhësve me ekspozim normal të kripës në mitër, edhe pse të dy grupet ishin ushqyer me një dietë normale pas shtatzënisë. Kjo sugjeron që një mjedis intrauterin me shumë kripë ka një ndikim në zhvillimin e foshnjave dhe se do të vazhdojë të veprojë kështu edhe për vitet në vijim. Përveç kësaj, për të përcaktuar ndikimin e një diete me shumë kripë në indet e zemrës së pasardhësve, ekspertët testuan nivele specifike proteinash dhe zbuluan se një mjedis i pasur me kripë mund të çojë në fibrozë kardiake, dhe nga ana tjetër shoqërohet me sëmundje të tilla si hipertensioni dhe insuficienca kardiake. Pasardhësit kishin gjithashtu një rrezik në rritje të zhvillimit të hipertensionit në moshën madhore. "Ky studim tregon se marrja e tepërt e kripës mund ta demtojë shëndetin tonë më shumë nga sa ne mendonim. Të gjithë duhet ta mbajmë marrjen e kripës brenda vlerave të rekomanduara nga udhëzimet, veçanërisht gratë gjatë shtatzënisë", përfundojnë autorët.
Gynecology and Obstetrics Clinical Medicine 2022. Doi: 10.1016/j.gocm.2022.03.001
http://doi.org/10.1016/j.gocm.2022.03.001