sht162024
Konsumimi i kanabisit lidhet me rreziqet shëndetësore të nënës në shtatzëni
Në një studim të publikuar në JAMA Internal Medicine është evidentuar lidhja ndërmjet përdorimit prenatal të kanabisit dhe efekteve të ndryshme anësore për shëndetin e nënës gjatë shtatzënisë. Ai përbën një burim të rëndësishëm të të dhënave për një kuptim më të mirë të efekteve të kanabisit në organizmin e nënës gjatë shtatzënisë. Në Kaliforni po shtohet përdorimi i kanabisit në shtatzëni, edhe falë legalizimit të shtuar dhe perceptimit të sigurisë, ndërsa efektet në shëndetin e nënës janë akoma të paqarta.
Në studim u përfshinë 316.722 shtatzëni në vitet 2011-2019 në Kaliforninë perëndimore, të cilat karakterizoheshin nga një kohëzgjatje të paktën 20-javore dhe që i ishin nënshtruar depistimit universal për përdorim prenatal të kanabisit. Ekspozimi ndaj kanabisit përcaktohej përmes autosinjalizimit, ose statusit pozitiv të testeve toksikologjike të kryera gjatë trajtimeve prenatale, rreth javës së dhjetë gjestacionale. Në 6.3% të shtatzënive të analizuara u vërejt përdorimi prenatal i kanabisit, me 2.9% të zbuluara përmes autosinjalizimit dhe 5.3% përmes testeve toksikologjike.
Rezultatet kryesore të studimit tregojnë një lidhje të konsiderueshme ndërmjet përdorimit prenatal të kanabisit dhe shtimit të rrezikut për hipertension gjestacional, preeklampsi dhe shkëputje të placentës. Këto rreziqe shfaqen veçanërisht më të theksuara në rastet e përdorimit të shpeshtë të kanabisit, me një lidhje dozë-përgjigje evidente për hipertensionin gjestacional: rreziku ishte më i madh me përdorimin e përditshëm, sesa me atë javor apo më pak të shpeshtë.
"Rezultatet e këtij studimi sugjerojnë që lidhja ndërmjet përdorimit prenatal të kanabisit dhe shëndetit të nënës është e ndërlikuar dhe nevojiten informacione të mëtejshme më të thelluara për të përcaktuar nëse këto lidhje janë rastësore", përfundojnë studiuesit.