kor82019
Sëmundja Lyme. Udhëzime të reja për trajtimin e duhur
Shoqata e Sëmundjeve Infektive në Amerikë, Akademia Amerikane e Neurologjisë dhe Kolegji Amerikan i Reumatologjisë kanë publikuar kohët e fundit në internet, në formën e një drafti në dispozicion për komente, një udhëzues të ri për trajtimin e sëmundjes Lyme. Paul Lantos (Sistemi Shëndetësor i Universitetit Duke, në Karolinën e Veriut) dhe një panel ekspertësh, kanë përgatitur rekomandime të ndryshme, mes të cilave edhe disa mbi trajtimin antibiotik pas pickimit të këpushës.
Në veçanti, sipas dokumentit, është e nevojshme që të administrohet te pacientët një trajtim antibiotik profilaktik, i përbërë nga një dozë e vetme doksicikline orale, brenda 72 orëve nga heqja e këpushës, vetëm pas një pickimi me rrezik të lartë dhe jo pas atyre me rrezik të ulët. Që të konsiderohen me rrezik të lartë, pickimet duhet të plotësojnë disa kërkesa, të tilla si: pickimin duhet ta ketë bërë një këpushë e tipit Ixodes, të jetë e fryrë dhe të ketë mbetur e ngjitur në lëkurë për 36 orë ose më shumë, si dhe të ketë ndodhur në një zonë shumë endemike. Në rast se është e nevojshme të menaxhohen efektet e pickimit, trajtimet e preferuara për eritemë migrante përfshijnë 10 ditë doksiciklinë ose 14 ditë amoksicilinë, acetoxyethylcephoxime ose phenoxymethylpenicilline.
Për pacientët që shfaqin meningjit, radikuloneurit me dhimbje, mononeuropati të shumëfishtë ose neuropati akute të nervave kranike dhe që mund të jenë ekspozuar ndaj këpushave me rrezik të lartë, rekomandohet testi i sëmundjes Lyme. Testi rutinë nuk rekomandohet për pacientët me sindroma të tjera neurologjike ose sëmundje psikiatrike dhe as për fëmijët me çrregullime zhvillimi, të sjelljes ose psikiatrike. Dokumenti nuk rekomandon përdorimin e antibiotikëve shtesë te pacientët me simptoma të vazhdueshme ose të përsëritura jo specifike, siç janë dhimbja ose lodhja, të cilët janë trajtuar për sëmundjen Lyme dhe që nuk kanë dëshmi të riinfektimit ose të dështimit të trajtimit. Udhëzimi përfshin gjithashtu informacione mbi vlerësimin e pacientëve me sëmundjen Lyme kronike, të cilët kanë shpesh çrregullime të tjera bazë.
IDSA
https://www.idsociety.org/practice-guideline/Lyme-Disease-Guideline-Public-Comments/