maj122021
Sindroma e distresit respirator akut. Shpresa të reja për trajtimin
Rezultatet e një studimi të kohëve të fundit kanë dhënë shpresë për trajtimin e sindromës së distresit respirator akut (ARDS) për shkak të gripit dhe potencialisht si rezultat i shkaqeve të tjera, përfshirë infeksionin nga Sars-CoV-2. Hulumtimi u krye veçanërisht mbi minjtë laboratorikë të infektuar me virusin H1N1. "ARDS-i te minjtë e infektuar nga gripi është i lidhur me nivele të reduktuara të liponukleotideve (pararendës thelbësorë për sintezën de novo të fosfolipideve) në qelizat epiteliale alveolare të tipit II (ATII). Meqenëse sinteza e fosfolipideve surfaktante është një funksion kryesor i qelizave ATII, ne hamendësuam se ndërprerja e këtij procesi mund të kontribuojë në mënyrë të konsiderueshme në patogjenezën e ARDS-ve të shkaktuara nga gripi", shpjegojnë studiuesit në "American Journal of Respiratory Cell and Molecular Biology".
Për të kuptuar nëse integrimi i liponukleotideve mund të zbutë ARDS-në, te minjtë u inokuluan doza të larta të virusit dhe më pas u krye një trajtim vetëm me liponukleotidin që mungonte ose me një kombinim të tij me liponukleotidet e tjera. Gjithçka ndodhi në kohë të ndryshme. Kështu, kafshët që morën liponukleotide një herë në ditë për 5 ditë, ishin të mbrojtura nga sëmundja e rëndë, ndërsa ato që u trajtuan vetëm një herë 5 ditë pas inokulimit dhe që kishin ARDS të shkaktuara nga humbja e rëndë e oksigjenit në gjak dhe inflamacion pulmonar, u përmirësuan. "Gjëja më e rëndësishme dhe mbresëlënëse në lidhje me këtë studim është fakti që kemi përfitime edhe kur e trajtojmë sëmundjen në një fazë të përparuar", konfirmoi Ian Davis, nga Universiteti Shtetëror i Ohajos, nënshkruesi i fundit i studimit, duke shpjeguar se nëse arrin të zhvillohet një bar bazuar në këto rezultate, mund të shmanget përdorimi i ventilatorit mekanik te një pacient i destinuar për të. Çështja kryesore është se liponukleotidet nuk vrasin qelizat e virusit, gjë që e bën trajtimin potencialisht efektiv për çdo lloj dëmtimi të mushkërive. "Problemi me barnat antivirale është se ndoshta ekziston nevoja për barna të ndryshme për secilin virus. Përveç kësaj, shumë viruse mund të pësojnë mutacione shpejt për t'u bërë rezistentë ndaj këtyre barnave", shpjegoi Davisi. Liponukleotidet mund të jenë të sigurta sepse ato ndodhin natyrshëm te gjitarët, përfshirë njerëzit, por shumë pyetje mbeten ende të hapura.
Am J Respir Cell Mol Biol 2021. Doi: 10.1165/rcmb.2020-0465OC.
https://doi.org/10.1165/rcmb.2020-0465OC