jan172022
Covid-19. Ja, çfarë i rrezikon më shumë punonjësit e shëndetësisë
Sipas një studimi të nënshkruar nga Spitali Universitar i Modenës, ndër faktorët kryesorë të rrezikut për infeksionin SARS-CoV-2 për ata që punojnë në shëndetësi janë, përveç mbipeshës, obezitetit dhe sëmundjeve respiratore kronike, edhe roli që kanë në spital dhe turnet e natës. Në veçanti, nga studimi, i kryer në periudhën mars 2020-janar 2021, 765 nga rreth 6,000 punonjësit e përfshirë rezultuan pozitivë në një tampon për kërkimin e virusit. Kjo shifër përkon me 13% dhe është më e lartë se mesatarja kombëtare italiane, e cila sipas të dhënave të Eurostatit ndalet në rreth 11%. Për më tepër, kur u morën parasysh vetëm operatorët shëndetësorë, shkalla e infeksionit ishte 13.8%.
Për Loretta Casolarin, një nga autoret e artikullit të botuar në Healthcare, ky studim jep një ide se sa i ka prekur pandemia operatorët italianë. Në veçanti, qëllimi ishte të vlerësohej incidenca e COVID-19 në grupin e marrë në shqyrtim dhe lidhja me disa nga faktorët kryesorë të rrezikut për infeksionin, qoftë individualë, qoftë profesionalë. Ndër ndryshoret e shqyrtuara në studim gjejmë gjininë, moshën, praninë e sëmundjeve kronike, indeksin e masës trupore, duhanin, rolin dhe punën gjatë natës. Krahasuar me ata që nuk punojnë në shëndetësi, punonjësit e shëndetësisë ishin më të prekur. Në vend të parë qëndrojnë infermierët dhe operatorët socio-shëndetësorë dhe më pas, mjekët. Krahasuar me profesionistët jo shëndetësorë, një rrezik i trefishtë u konstatua te infermierët dhe i dyfishtë te mjekët. Gjithashtu, u vu re një lidhje midis rrezikut të infeksionit dhe punës gjatë natës. Ai lidhet ndjeshëm me numrin e përgjithshëm të turneve gjatë periudhës 11-mujore të shqyrtuar në studim.
"Megjithëse fushata e vaksinimit të operatorëve shëndetësorë që filloi në janar 2021 ka ndryshuar në masë të madhe skenarin e infeksionit SARS-CoV-2 në stafin e spitalit, veçanërisht duke marrë parasysh paraqitjen progresive të varianteve të reja dhe më të transmetueshme të virusit, të dhënat nga ky studim mund të jenë të rëndësishme për zhvillimin e mëtejshëm të strategjive politike dhe shëndetësore për të zbutur evolucionin e pandemisë", përfundojnë studiuesit.
Healthcare 2021. Doi: 10.3390/healthcare9111495.
https://doi.org/10.3390/healthcare9111495