kor282022
Vlerësimi i trashjes së gjakut te pacientët e hospitalizuar nga Covid-19 është parashikues i vdekshmërisë
Sipas një studimi të botuar në Journal of the American College of Cardiology, trashja e lartë e gjakut lidhet me një rrezik në rritje të vdekshmërisë te pacientët e shtruar në spital nga COVID-19.
"Në praktikën e përditshme, mjekët matin përgjithësisht hematokritin, globulinat, diferencën midis proteinës totale dhe albuminës, te të gjithë pacientët e shtruar në spital për qëllime diagnostikuese dhe terapeutike. Në anën tjetër, trashja e gjakut, e cila mund të vlerësohet nga hematokriti dhe globulinat, nuk llogaritet kurrë", shpjegon koordinatori i studimit Robert Rosenson (Icahn School of Medicine Mount Sinai, Nju Jork). "Pas rregullimeve të gjera për faktorët ngatërrues të mundshëm, të dhënat tona tregojnë se trashja e gjakut është një parashikues i vdekshmërisë dhe mbetet i rëndësishëm edhe pas rregullimit sipas proteinave inflamatore sistemike. Është e rëndësishme të theksohet se ky parametër është më i rëndësishëm se D-dimeri dhe bioshënjuesit e tjerë të përdorur për të identifikuar pacientët me rrezik të lartë të ngjarjeve kardiovaskulare dhe vdekshmërisë", shton studiuesi.
Për të arritur në këto përfundime, studiuesit ekzaminuan të dhënat mjekësore të 5,621 pacientëve me COVID-19 të shtruar në 6 spitale të sistemit shëndetësor të Mount Sinai në periudhën 27 shkurt 2020-27 nëntor 2021 dhe i ndoqën deri në daljen nga spitali ose vdekjen. "Krahasuar me subjektet me trashje të ulët të gjakut, pacientët e shtruar në spital me trashje të lartë të gjakut të vlerësuar në kushte me fluks të lartë (arterie), ose rrjedhje të ulët (mikroqarkullim) kishin një shkallë të rritur vdekshmërie, respektivisht 60% dhe 32%", shkruajnë autorët, duke kujtuar se trashja e gjakut rritet në prani të përqendrimeve të larta të proteinave të fazës akute si fibrinogjeni dhe makroglobulinat, të cilat nga ana e tyre rriten në infeksionet akute COVID-19.
"Trashja e vlerësuar e gjakut është një matje e proteinave të fazës akute dhe rritjes së linjave qelizore gjatë infektimit me koronavirus. Dhe kur është e lartë, mjekët mund të marrin në konsideratë përdorimin e heparinës, hidratimit ose glukokortikoideve për të reduktuar ashpërsinë e përgjigjes së fazës akute ndaj infeksionit COVID-19", përfundon Rosensoni.
JACC 2022. Doi: 10.1016/j.jacc.2022.04.060
http://doi.org/10.1016/j.jacc.2022.04.060