tet312022
Shpresa të reja për trajtimin e kancerit kolorektal metastatik. Studimi
Një grup studiuesish nga spitali IRCCS San Raffaele, kanë përshkruar për herë të parë një qasje të re imunoterapeutike peri operative me interferon alfa, të aftë për të parandaluar metastazat e mëlçisë nga kanceri kolorektal primar.
Studimi paraklinik u koordinua nga Giovanni Sitia, kreu i Njësisë Kërkimore të Hepatologjisë Eksperimentale në bashkëpunim me Luca Guidotti, zëvendësdrejtor shkencor në Universitetin Vita-Salute San Raffaele.
Interferoni alfa është një molekulë e prodhuar normalisht nga trupi ynë dhe ka një aktivitet të fuqishëm antitumoral. Vetitë antitumorale të interferonit alfa janë të njohura në fushën mjekësore. Megjithatë, administrimi sistematik në doza relativisht të larta ka treguar efikasitet të kufizuar, kryesisht për shkak të efekteve anësore të rënda në të gjithë trupin.
Studiuesit administruan interferonin alfa me dozë të ulët në modelet e minjve të sëmurë, pak para dhe gjatë ndërhyrjes për heqjen e kancerit kolorektal.
Pas administrimit me këtë modalitet inovativ, shkencëtarët vunë re se medikamenti ishte në gjendje të stimulonte qelizat endoteliale të mëlçisë për të ndërtuar një pengesë vaskulare. Nga ana tjetër, medikamenti ishte në gjendje të kufizonte hyrjen e qelizave kancerogjene në organin në fjalë, duke parandaluar kështu formimin e metastazave.
"Ky rezultat është i mundur falë mekanizmave të shumtë të ndërmjetësuar nga interferoni alfa. Fillimisht ai vepron duke ndërtuar barriera reale fizike në qelizat endoteliale, të cilat rreshtojnë brendësinë e enëve të gjakut, duke parandaluar kolonizimin e mëparshëm dhe rritjen metastatike. Më pas, interferoni alfa nxit përgjigjen imune kundër metastazave kolorektale, duke siguruar mbrojtje afatgjatë pa shkaktuar efekte anësore të dukshme", shpjegon Giovanni Sitia.
Për të përmirësuar profilin farmakokinetik të interferonit alfa, duke e bërë atë më efektiv dhe më të tolerueshëm, studiuesit në San Raffaele krijuan këtë strategji të re. Nga njëra anë, medikamenti përdoret në doza të ulëta, nga ana tjetër administrohet në fazën perioperative, i konsideruar si një moment kritik në përhapjen metastatike të qelizave kancerogjene.
"Në këtë mënyrë, interferoni, i çliruar vazhdimisht, para dhe pas operacionit, është në gjendje të stimulojë qelizat endoteliale të mëlçisë dhe të orkestrojë funksionet e saj të shumta antitumorale, duke shmangur efektet toksike të administrimit të dozave të larta", shton Sitia.
Prandaj, interferoni alfa me çlirim të ngadaltë, i miratuar tashmë për përdorim klinik, mund të përdoret si imunoterapi para dhe gjatë operacionit primar të heqjes së kancerit kolorektal, veçanërisht në pacientët me rrezik të shtuar të zhvillimit të metastazave në mëlçi.
"Rezultatet tona ofrojnë, në nivelin paraklinik, dëshmi inkurajuese të efikasitetit dhe sigurisë së strategjisë. Tani është e nevojshme të vlerësohet me studime të mëtejshme se cilët pacientë me kancer primar kolorektal mund të përfitojnë më së miri nga kjo terapi peri operative dhe të përgatitet prova klinike që mund të fillojë pas disa vitesh", përfundon Giovanni Sitia.