tet162024
Ankthi dhe depresioni, më të shpeshtë te të rinjtë me dhimbje kronike
Të rinjtë që vuajnë nga dhimbjet kronike kanë një probabilitet më të lartë të përjetojnë ankth ose depresion krahasuar me bashkëmoshatarët e tyre. Në këtë përfundim ka arritur një hulumtim i publikuar në JAMA Pediatrics, sipas të cilit, pothuajse një në tre të rinj nën 18 vjeç me dhimbje kronike vuan gjithashtu nga çrregullimet e ankthit, ndërsa një në tetë nga çrregullimet depresive.
Sipas autorëve, dihet se të rinjtë me dhimbje kronike mund të vuajnë nga ankthi dhe depresioni, por vlerësimet e prevalencës së këtyre efekteve negative të shëndetit mendor janë ende të paqarta. Për të analizuar lidhjen, ekipi kreu një rishikim në të cilin u përfshinë 79 studime.
Studiuesit analizuan dallimet në simptoma midis grupeve. Kampioni i përgjithshëm përfshiu 22,956 fëmijë me një moshë mesatare 13,7 vjeç, 12,614 prej të cilëve kishin dhimbje kronike dhe shumica ishin vajza, 74%.
Përsa i përket dhimbjes, fëmijët vuanin si nga patologji në të cilat dhimbja është simptoma primare, si artriti idiopatik i mitur apo fibromialgjia, edhe nga sëmundje kronike në të cilat dhimbja është simptomë dytësore, si sëmundja inflamatore intestinale.
Sipas rezultateve, prevalenca e diagnozave të ankthit në mesin e të rinjve me dhimbje kronike ishte afërsisht 34.6% (95%CI: 24-47%) dhe proporcioni që tejkalonte rezultatet e prerjes klinike ishte afërsisht 23.9% (95%CI, 18,3%-30,6%). Frekuenca e diagnozave të çrregullimit depresiv ishte më e ulët me rreth 12.2% (95%CI, 7.8%-18.7%) e të rinjve që morën diagnozën e këtij çrregullimi të shëndetit mendor. Për më tepër, përqindja që tejkalonte rezultatet klinike për depresionin ishte 23.5% (95%CI, 18.7%-29.2%).
Prandaj, krahasuar grupin e kontrollit, të rinjtë me dhimbje kronike kishin simptoma më të mëdha si të ankthit ashtu edhe të depresionit. Për më tepër, nga analizat e nëngrupeve, studiuesit theksuan se vendndodhja e dhimbjes, si dhe mosha dhe gjinia e pjesëmarrësve, ishin faktorë potencialë të lidhur me ankthin dhe depresionin.
Burimi:
Dudeney J. et al., Anxiety and depression in youth with chronic pain: A systematic review and meta-analysis. Jama Pediatr (2024); doi: 10.1001/jamapediatrics.2024.3039