kor182022
Infeksioni nga virusi herpes mund të rrisë rrezikun e diabetit
Një studim i publikuar në Diabetologia tregon se dy viruse të zakonshme herpesi mund të kontribuojnë në ndryshimin e metabolizmit të glukozës duke rritur rrezikun e diabetit të tipit 2 (DM2) te të infektuarit.
"Viruset e herpesit janë të përhapur te njerëzit, me tetë lloje të njohura: herpes simplex (HSV) 1 dhe 2, varicella-zoster (VZV), Epstein-Barr (EBV), citomegalovirus (CMV) dhe herpes human (HHV) 6, 7 dhe 8. Të gjithë shkaktojnë infeksione latente te bujtësit pas një episodi fillestar përgjithësisht të lehtë ose asimptomatik", thotë autori i kryesor i studimit Tim Woelfle (Universiteti Ludwig-Maximilians, Mynih), i cili së bashku me kolegët e tij analizuan të dhënat e 1967 pjesëmarrësve të studimit KORA (Cooperative Health Research in the Augsburg Region), në Gjermaninë jugore. Pjesëmarrësit iu nënshtruan ekzaminimeve të detajuara shëndetësore si në fillim (2006-2008) ashtu edhe në vazhdim të studimit (2013-2014): testimet për praninë e viruseve të herpesit human, testi oral i tolerancës së glukozës (OGTT) dhe matja e hemoglobinës së glikuar (HbA 1c). Prevalenca e prediabetit dhe DM2 ishin respektivisht 27.5% dhe 8.5% në fillim dhe 36.2% dhe 14.6% gjatë ndjekjes. Nga 1257 subjekte me tolerancë normale të glukozës në fillim, 364 zhvilluan prediabet dhe 17 zhvilluan DM2 gjatë ndjekjes mesatare prej 6.5 vitesh", thonë autorët, duke nënvizuar se, ndërmjet viruseve të ekzaminuar të herpesit, HSV2 dhe CMV ishin të lidhur me incidencën e prediabetit tek individët me tolerancë normale të glukozës bazë. Veçanërisht, bartësit e HSV2 dhe CMV kishin përkatësisht 59% dhe 33% më shumë gjasa për të zhvilluar prediabet, krahasuar me zeronegativët.
"Studimi ynë sugjeron se ndërsa incidenca e prediabetit shpjegohej kryesisht nga mosha, indeksi i masës trupore (BMI), kolesteroli dhe glukoza esëll, si HSV2 ashtu edhe CMV tani shtojnë më shumë informacion mbi rrezikun për të zhvilluar sëmundjen. Pas konfirmimit si duhet të të dhënave tona, do të nevojiten kërkime të mëtejshme për të vlerësuar strategjitë e parandalimit viral në shëndetin publik, ndoshta duke përfshirë zhvillimin e vaksinave efektive kundër viruseve herpes", përfundon Woelfle.
Diabetologia 2022. Doi: 10.1007/s00125-022-05704-7
https://doi.org/10.1007/s00125-022-05704-7