qer12016

Dëmi renal akut: fillimi i hershëm i dializës përmirëson prognozën në pacientin kritik

Artikuj lidhur

22-12-2023 | Nefrologjia. Dieta mesdhetare, si aleate e ruajtjes së shëndetit të veshkave

12-07-2023 | Dëmtimi renal akut nuk e përkeqëson rrjedhën e sëmundjes kronike

21-06-2023 | Një algoritëm i ri mund të parashikojë komplikimet renale që shkakton DM2

Në një studim të publikuar në revistën "Jama", Alexander Zarbock nga Spitali universitar i Munsterit në Gjermani dhe kolegët tij kanë analizuar nëse një fillim i hershëm i terapisë  zëvendësuese te pacientët me insuficiencë renale akute të rëndë, do të ishte në gjendje të reduktonte normën e vdekshmërisë  për të gjitha shkaqet në 90 ditë.

Studimi është prezantuar në kongresin e 53' të Shoqatës Evropiane të Veshkave dhe Shoqatës Evropiane të Dializës dhe Transplanteve (ERA-EDTA) në Vjenë nga 21 deri në 24 maj. "Dëmi akut i veshkave është një komplikacion i njohur për shumë kushte të rënda, me një efekt negativ në dekursin e sëmundjes", shkruajnë autorët duke kujtuar se pavarësisht progreseve të fundit në menaxhimin e pacientëve kritikë, shkalla e vdekshmërisë për shkak të dëmtimit akut të veshkave mbetet e lartë ndërsa koha optimale e fillimit të terapisë zëvendësuese renale te pacientët kritikë me një dëm të tillë mbetet e panjohur. 

Duke u nisur nga këto supozime kërkuesit kanë ndarë 231 pacientë me dëm akut të veshkave në shkallë të rëndë, për trajtimin zëvendësues me hemodializë ose dializë  peritoneale brenda 8 ose 12 orëve nga diagnoza e vetë dëmit.
Ata zbuluan se fillimi i hershëm i terapisë zëvendësuese renale, jo vetëm ka reduktuar në mënyrë domethënëse vdekshmërinë me 90 ditë në krahasim me fillimin e vonuar, me norma respektive prej 39% dhe 55%, por edhe ka përmirësuar rigjenerimin e funksionit renal (54% vs 39%). Me trajtimin e hershëm janë reduktuar në nivel domethënës edhe kohëzgjatja e terapisë zëvendësuese renale (9 ditë kundrejt 25) dhe qëndrimi në spital (51 kundrejt 82 ditëve).

Ndërsa asnjë ndryshim nuk ka rezultuar sa i takon përmirësimit të funksionit të organeve dhe kohëzgjatjes në terapi intensive.
Pavarësisht se ky studim na ofron të dhëna të rëndësishme mbi efikasitetin e terapisë zëvendësuese renale në dëmin renal akut në fazë të avancuar, rezultatet duhet të konfirmohen nga studime multiqendrore për të përcaktuar momentin optimal  për nisjen e terapisë zëvendësuese renale te pacientë kritikë me dëm akut të veshkave", përfundon Zarbock.

Jama 2016. doi:10.1001/jama.2016.5828
http://jama.jamanetwork.com/article.aspx?doi=10.1001/jama.2016.5828