tet112022
Alzheimeri mund të jetë një sëmundje autoimune. Studimi shpjegon arsyen
Ekziston një teori e re në lidhje me sëmundjen e Alzheimerit (AD). Në një artikull të botuar në Alzheimer's & Dementia, propozohet një model i ri mekanik në të cilin Alzheimeri, në vend që të jetë një çrregullim "i" trurit, është një sëmundje autoimune "në" tru.
"Ne kemi nevojë për mënyra të reja për të menduar në lidhje me këtë sëmundje dhe ne kemi nevojë për to tani", tha autori kryesor i studimit Donald F. Weaver nga Instituti Krembil Brain në Kanada, i cili shpjegoi se deri më tani kërkimet janë bazuar në teorinë se proteina beta-amiloide gjendet në mënyrë jonormale në tru, aty ku dhe akumulohet.
"Sidoqoftë, ne besojmë se beta-amiloidi është aty ku duhet të jetë. Ai do të vepronte si një imunopeptid, një lajmëtar brenda sistemit tonë imunitar, në mënyrë që nëse kemi një dëmtim në kokë, ta riparojë atë. Nëse shfaqet një virus apo bakter, beta-amiloidi është aty për ta luftuar atë", tha autori.
Prandaj, beta-amiloidi do të ishte një citokinë e aftë për të shkaktuar një kaskadë të imunitetit të lindur në përgjigje të disa ngjarjeve. Pikërisht ne këtë moment do të fillonin edhe problemet. Sipas teorisë, proteina nuk do të ishte në gjendje të dallonte bakteret nga neuronet, për shkak të disa ngjashmërive të tyre. Sulmi i mëvonshëm ndaj këtyre qelizave nga beta-amiloide do të binte në kuadrin e një sëmundjeje autoimune.
Produktet e zbërthimit të neuroneve nekrotike do të shkaktonin një çlirim të mëtejshëm të beta-amiloidit, e kështu me radhë. Për të zhvilluar një model gjithëpërfshirës inovativ të AD-së që, siç shpjegohet në artikull, "harmonizon teoritë e shumta divergjente në një shpjegim gjithëpërfshirës të unifikuar", ekipi hulumtues ekzaminoi tërësisht literaturën shkencore.
"Rezultatet sollën një model të ri molekular të integruar për AD-në, 'sëmundja e Alzheimerit si një sëmundje autoimune (AD2)'. Në AD2, AD-ja është një çrregullim i lindur i imunitetit me qendër trurin që përfshin mekanizma shoqërues autoimune dhe autoinflamatorë", shpjegon autori.
Modeli kërkon të harmonizojë propozime të tjera mekanike dhe e njeh beta-amiloidin si një imunopeptid fiziologjikisht oligomerizues dhe pjesë e një procesi imunopatik shumë më të gjerë dhe shumë të ndërlidhur. Për më tepër, në model, metabolizmi i L-triptofanit dhe ai i L-argininës janë rregullues të imunitetit të lindur, gjë që mund të tregojë qasje të reja për diagnostikimin dhe trajtimin e kësaj patologjie. "Në laborator jemi shumë entuziastë. Ne mendojmë se kjo teori autoimune është e vlefshme dhe përfaqëson një zbulim të rëndësishëm konceptual", përfundon Weaver.
Alzheimer's & Dementia 2022. Doi: 10.1002/alz.12789.
https://doi.org/10.1002/alz.12789