tet132022
Cistiti dhe higjiena e mirë. Ku është kufiri dhe kur e teprojmë
Ruajtja e higjienës së mirë intime është me rëndësi të madhe për gratë. Kujdesi i duhur për këtë zonë delikate ndihmon në parandalimin e inflamacionit, infeksioneve, aromave të pakëndshme dhe sigurisht, është një mënyrë për të parandaluar cistitin dhe infeksionet e traktit urinar. Megjithatë, a ka raste kur mund ta teprojmë me higjienën? Dhe në çfarë mund të çojë kjo?
Cistiti
Cistiti është një inflamacion i fshikëzës dhe një nga uroinfeksionet më të zakonshme, i cili zakonisht shkaktohet nga një infeksion bakterial. Në varësi të kohëzgjatjes së këtij inflamacioni, cistiti ndahet provizorisht në akut dhe kronik. Më i zakonshëm nga të dy llojet është cistiti akut. Në 80-90% të rasteve, shkaktari tipik i cistitit dhe i infeksioneve të tjera të traktit urinar është bakteri Escherichia coli (E. coli), i cili ka hyrë në rrugët urinare.
Simptomat e cistitit janë një ndjesi djegieje gjatë urinimit, rëndim dhe shqetësim në zonën e legenit, nxitje të shpeshta për të urinuar, ndonjëherë edhe gjak në urinë. Cistiti shfaqet më shpesh te gratë për shkak të karakteristikave të tyre anatomike. Uretra e femrës është shumë më e shkurtër (4 cm) se ajo e mashkullit (20 cm), e cila predispozon mikroorganizma të ndryshëm të hyjnë lehtësisht përmes saj dhe të infektojnë fshikëzën. Gratë vuajnë rreth 30 herë më shumë se meshkujt nga cistiti. Përveç shqetësimit që na shkaktohet, cistiti mund të jetë edhe mjaft persistent - shpesh ndodh që infeksioni të përsëritet (rikthimet). Cistiti i trajtuar gabimisht në 85% të rasteve bëhet kronik. Është e rëndësishme të theksohet se nëpërmjet trajtimit të duhur të kombinuar me profilaksinë, shpeshtësia dhe intensiteti i episodeve të përsëritura mund të reduktohet.
Higjiena e mirë
Rregulli numër një për një jetë pa cistit: higjiena e mirë personale. Escherichia coli është shkaktari më i zakonshëm i cistitit, bakteri jeton brenda zorrës së trashë dhe jashtë, përreth zonës anale. Në disa raste mund të "migrojë" në uretër (kanalin urinar) nga ku mund të arrijë në fshikëzën e urinës dhe të shkaktojë cistit. Si ndodh?
● Fshirja jo e duhur pas përdorimit të tualetit mund të bartë bakteret nga zona anale në uretër. Mbani mend, drejtimi i duhur është para-mbrapa.
● Seksi ndihmon në transferimin e baktereve nga zona anale në uretër. Kjo ndodh kur alternoni seksin anal me atë vaginal, pasi kjo shkakton lëvizjen e baktereve nga njëri vend në tjetrin. Ky lloj infeksioni i lidhur me seksin madje ka termin e vet: cistitis postkoital. Kjo është arsyeja pse është e rëndësishme që gratë të urinojnë pas marrëdhënieve seksuale, sepse urina e tyre është sterile dhe kështu, çdo bakter i dëmshëm në uretër dhe fshikëz "lahet".
● Disa mjete kontraceptive mekanike si diafragma mund të çojnë në cistit.
● Të brendshmet e papërshtatshme mund të favorizojnë gjithashtu shfaqjen e cistitit. Zgjedhja e duhur janë të brendshmet e bëra nga pëlhura natyrale.
Bilanci i dëmtuar dhe cistiti
Kur flasim për higjienë të mirë është mirë të pyesim veten se ku është kufiri dhe kur e kalojmë atë? Cila është lidhja mes vaginës, fshikëzës dhe... cistitit.
Në organizmin tonë jetojnë baktere dhe mikroorganizma - të tilla ka në stomak, në vaginë dhe madje edhe në pjesën fundore të uretrës. Ne rrallë i mendojmë ato si një gjë të mirë dhe priremi t'i sulmojmë me "armë" të ndryshme, si: peceta antibakteriale, sapunë, dezinfektues. Megjithatë, shumë prej tyre kanë një rol në ruajtjen e ekuilibrit në trupin tonë dhe këto janë të ashtuquajturat "baktere të mira". Më e mira për shëndetit tonë është ruajtja e këtij ekuilibri në mënyrë që trupi ynë të jetë i mbrojtur.
Ndërsa fshikëza dhe nivelet e sipërme të traktit urinar janë sterile, vagina mund të bëhet lehtësisht një rezervuar i mundshëm i "baktereve të këqija". Çdo ndryshim në mikroflorën vaginale rrezikon të prishë ekuilibrin dhe ta popullojë atë me baktere që më pas, për shkak të afërsisë së vaginës dhe hyrjes së uretrës, mund të vendosen lehtësisht edhe në fshikëz. Por çfarë e shkakton një ndryshim në mikroflorën vaginale? Ka shumë arsye të mundshme, një prej të cilave mund të jetë përdorimi i tepruar dhe i shpeshtë i dusheve intime për femra dhe produktet intime, të cilat mund të çojnë në një ndryshim në pH-in normal të vaginës.
Kur flasim për higjienën personale të tepruar, flasim për produkte kozmetike që kur përdoren me tepricë, mund të dëmtojnë ekuilibrin e mikroflorës vaginale. Mikroflora vaginale mbrohet nga të ashtuquajturat baktere të acidit laktik, të cilat veprojnë si një barrierë natyrore. Përdorimi i tepërt i produkteve të higjienës intime çon në dëmtimin e kësaj barriere natyrore: "bakteret e mira" asgjësohen. Kjo, nga ana tjetër, krijon një mjedis të favorshëm për kolonizimin me "baktere të këqija", të cilat nga ana tjetër, për shkak të distancës së shkurtër, mund të arrijnë lehtësisht në fshikëzën e urinës dhe të shkaktojnë cistit.
Megjithatë, nëse është e nevojshme të përdorni produkte intime, është mirë të zgjidhni produkte që nuk përmbajnë substanca shtesë parfumi.
Shënim i rëndësishëm:
Mos e teproni! Si çdo gjë tjetër që është e tepruar, higjiena e tepërt ka rreziqet e veta. Është e mundur të prishim ekuilibrin e mikroflorës të cilat pasojnë me shqetësime shtesë.
Mos e mbani "të keqen" brenda! Zbrazja e fshikëzës është e rëndësishme për parandalimin e cistitit. Nëse e "mbajmë" për orë të tëra, krijojmë një mjedis të favorshëm për rritjen e baktereve pasi privojmë trupin nga "pastrimi" i dobishëm nga bakteret me anë të urinimit.
Përdorni fuqinë e ujit - merrni mjaftueshëm ujë dhe lëngje në përgjithësi për të siguruar funksionimin normal të veshkave dhe për të shmangur urinën e përqendruar, që është një tjetër kusht i favorshëm për cistitin. Sasia optimale e marrjes së lëngjeve është nga një e gjysmë deri në dy litra në ditë. Sigurisht që nuk nënkuptojmë vetëm ujin si lëng, mund të konsumoni edhe çajra bimore, lëng natyral etj.
Dhe në fund...
Trajtimi i cistitit është kompleks - nga sjelljet e duhura për parandalim (d.m.th. masat paraprake) deri te trajtimi i duhur. Me anë të profilaksisë ne mund të shmangim komplikimet. Shumë ekstrakte bimore si boronica, mështekna e bardhë, manaferra ose Buchu kanë provuar efekte të dobishme për parandalimin dhe menaxhimin e shqetësimit akut të cistitit. Ruajtja e higjienës personale është e rëndësishme për parandalimin e Cistitit, por mos e teproni dhe bëni kujdes me produktet intime që zgjidhni, për të mos prishur ekuilibrin e mikroflorës urogjenitale.
Lexo më shumë:
Dieta dhe cistiti
Bakteret dhe viruset - dallimet, llojet e trajtimit dhe këshilla të dobishme