dhj192019
Udhëzimet mbi traumat kraniale: 26 rekomandime për parandalimin, vlerësimin dhe menaxhimin
Një grup prej 11 ekspertësh kanë hartuar 26 rekomandime për parandalimin, vlerësimin dhe menaxhimin e tronditjeve cerebrale të lidhura me sportin midis sportistëve të rinj, por në shumë raste ka kufizime në sasinë dhe cilësinë e studimeve të disponueshme për zhvillimin e rekomandimeve specifike.
"Me fjalë të tjera, përsa i përket rrezikut të tronditjes, nuk është e qartë nëse një moshë specifike ose një fazë e veçantë e zhvillimit është më e sigurt ose më e përshtatshme për të nisur sportet e kontaktit", tha Frederick Rivara, nënshkruesi i parë i dokumentit të botuar në "JAMA Pediatrics" dhe profesor në Departamentin e Pediatrisë të Universitetit të Uashingtonit në Siatëll, duke shtuar se megjithëse një histori e kaluar e tronditjeve cerebrale është faktor rreziku për të ardhmen, nuk ka një numër të caktuar ngjarjesh që mund të parashikojnë se kur ose nëse një fëmijë duhet të heqë dorë nga ushtrimi i sporteve të kontaktit.
"Fatkeqësisht, për shumë nga temat e trajtuara ka kufizime në sasinë dhe cilësinë e studimeve që nuk lejojnë zhvillimin e rekomandimeve specifike", shkruajnë studiuesit, duke theksuar megjithatë që përkundër këtyre kufizimeve dhe mungesës së të dhënave të publikuara, dokumenti përmban disa përfundime dhe rekomandime. "Prindërit, pjesëmarrësit në sportet rinore, trajnerët dhe palët e tjera të interesuara duhet të informohen nëse një histori tronditjeje cerebrale, krahasuar me asnjë tronditje të mëparshme, është e lidhur me një rrezik të shtuar për tronditje të mëvonshme, që mund të çojnë në simptoma më afatgjata dhe kohë më të gjatë rikuperimi", shkruajnë ekspertët.
"Megjithatë, sportet rinore dhe përfitimet fizike e psikosociale që rrjedhin prej tyre janë thelbësore për zhvillimin e fëmijëve të shëndetshëm dhe individëve fizikisht aktivë për jetën. Për këtë arsye, shqetësimet në lidhje me tronditjet që lidhen me sportet e kontaktit duhet të balancohen në bazë të përfitimeve të shumta të një stili jetese aktive", përfundon Rivara.
JAMA Pediatr. 2019. doi: 10.1001/jamapediatrics.2019.4006
https://www.ncbi.nlm.nih.gov/pubmed/31710349