jan72025
Mungesa e vitaminës D dhe apnea obstruktive e gjumit te fëmijët
Fëmijët që vuajnë nga apnea obstruktive e gjumit (OSA) dhe që për shkak të saj kanë hequr bajamet dhe adenoidet mund kenë edhe mungesë të vitaminës D, tregon një hulumtim i publikuar në JAMA Otolaryngology - Head & Neck Surgery dhe i koordinuar nga Andrew Bluher nga Nemours's Children's Hospital.
Apnea obstruktive e gjumit shkaktohet nga bllokimi i plotë ose i pjesshëm i rrugëve të sipërme të frymëmarrjes që ndodh gjatë gjumit. Vlerësohet se 2-5% e fëmijëve e të gjitha moshave janë të prekur, më së shpeshti midis moshës 2 dhe 6 vjeç. Dy faktorët kryesorë të rrezikut janë hipertrofia adenotonsilare dhe obeziteti, edhe pse kjo gjendje shoqërohet gjithashtu me keqformime kraniofaciale dhe sëmundje neuromuskulare.
OSA-ja mund të shfaqet me simptoma si gjatë natës ashtu edhe gjatë ditës. Gërhitja është e pranishme në shumicën e fëmijëve me këtë sëmundje, megjithëse nuk është e mjaftueshme për diagnozën, ashtu si mungesa e saj nuk mund ta përjashtojë praninë e OSA-së. Simptoma të tjera të natës përfshijnë frymëmarrje të zhurmshme, pauza në frymëmarrje, gjumë të shqetësuar dhe djersitje. Simptomat e ditës konsistojnë në vështirësi për t'u përqendruar në shkollë, nervozizëm, tharje të gojës, dhimbje koke dhe përgjumje të tepruar. Në rastet kur ka dyshime, analiza të tilla si pulsoksimetria e natës dhe polisomnografia, janë thelbësore për diagnostikimin e apnesë obstruktive të gjumit.
Studimi amerikan përfshiu 72 fëmijë me një moshë mesatare 6.7 vjeç dhe me OSA të rëndë, të cilët i ishin nënshtruar ndërhyrjes kirurgjikale për të hequr bajamet dhe adenoidet. Te pacientët e vegjël u vlerësuan nivelet e 25[OH]D në serum dhe u mblodhën mostrat e gjakut gjatë agjërimit për të identifikuar mungesën e vitaminës D.
Rezultatet treguan se indeksi mesatar apnea-hipopnea (AHI), i përdorur për të klasifikuar OSA-në, ishte 42.8. Studiuesit theksuan se mungesa e vitaminës D ishte më e pranishme te fëmijët më të vegjël në moshë, vajzat dhe ata me AHI më të lartë. Për më tepër, midis 72 fëmijëve, 37.5% kishin mungesë të vitaminës D, gjë që sugjeron se nivelet e ulëta ndikojnë në rezultatet më të larta të AHI-së. Sipas autorëve, për këtë arsye është e nevojshme të kryhen kërkime të mëtejshme për të vlerësuar nëse plotësimi i vitaminës D mund të ketë një ndikim pozitiv në apnenë obstruktive të gjumit te fëmijët.