sht162021
Edhe një periudhë e shkurtër ushqyerjeje me gji, mund të reduktojë vlerat e presionit të gjakut te fëmijët
Sipas një studimi të botuar në Journal of the American Heart Association, foshnjat që janë ushqyer me gji, edhe për vetëm disa ditë, kanë presion më të ulët të gjakut në fëmijëri. "Foshnjat që morën edhe një sasi relativisht të vogël të qumështit të gjirit të sekretuar në ditët e para të jetës (kulloshtër), shfaqën presion më të ulët të gjakut për tre vjet, pavarësisht sa kohë u ushqyen me gji ose kur morën ndonjë ushqim tjetër plotësues", thotë Kozeta Miliku (Universiteti McMaster i Hamiltonit, Ontario, Kanada), emri i parë në studim.
Studiuesit analizuan ushqimin e foshnjave dhe të dhënat mjekësore të 2,400 fëmijëve të regjistruar në studimin e grupit kanadez CHILD, i cili ndjek një grup foshnjash të lindura në periudhën 2009-2012, për të kuptuar se si ndikojnë në shëndet përvojat e hershme të jetës. Nga pjesëmarrësit në studim, 98% e foshnjave u ushqyen me gji për të paktën një kohë të shkurtër, 62% u ushqyen ekskluzivisht me gji për të paktën tre muaj dhe 4%, vetëm gjatë qëndrimit në spital. Në moshën tre vjeç, 2% e foshnjave që nuk ishin ushqyer kurrë me gji, kishin nivele më të larta të presionit të gjakut sesa foshnjat që kishin pirë qumështin e nënës së tyre, pavarësisht nga kohëzgjatja e ushqyerjes me gji, indeksi i masës trupore të fëmijëve dhe nëse ata merrnin ushqime të tjera ose substanca ushqyese. Faktorët socialë, shëndetësorë dhe stili i jetesës së nënave nuk ndikuan në ndryshimin e vlerave të presionit të gjakut. Autorët theksojnë se përfitimet e ushqyerjes me gji për një kohë të gjatë dhe ekskluzivisht, janë të dokumentuara mirë për një sërë patologjish, përfshirë infeksionet respiratore, sëmundjet me diarre në fëmijëri dhe sëmundjet kronike, përfshirë astmën dhe obezitetin më vonë në jetë, por studimi i tyre tregon se edhe një periudhë e shkurtër e ushqyerjes me gji është e dobishme për rezultatet kardiovaskulare, siç është presioni i gjakut.
"Rezultatet e punës sonë sugjerojnë që kursimet afatshkurtra nga mosofrimi i mbështetjes për ushqyerjen me gji në spital dhe dalja shumë e shpejtë e nënave të reja nga spitali, mund të kompensohen kryesisht nga kostot afatgjata të reduktimit të shëndetit kardiovaskular, më vonë në jetë", përfundojnë studiuesit.
JAHA 2021. Doi: 10.1161/JAHA.120.019067
https://doi.org/10.1161/JAHA.120.019067