mar42022
Gjysma e fëmijëve në botë konsumojnë pije me kafeinë
Sipas një studimi të botuar në BMJ, pijet energjike, jo vetëm që konsumohen çdo javë nga gjysma e fëmijëve në botë dhe nga një e treta e atyre që jetojnë në Britani, por nëse pihen pesë ose më shumë herë në javë, ato mund të shkaktojnë probleme me shëndetin dhe me sjelljen.
"Në vitin 2018, qeveria e Britanisë së Madhe kreu një hetim mbi ndalimin e shitjes së këtyre pijeve për fëmijët, por duke qenë se vetëm dy nga studimet e disponueshme ishin zhvilluar në Britani, u krye një analizë për të garantuar rëndësinë, me synim politikën britanike", shpjegon autorja kryesore, Claire Khouja (Universiteti i Jorkut në Britani). Kështu, synimi i studimit ishte të zbulonte se sa dhe cilat pije energjike kanë konsumuar adoleshentët britanikë, duke eksploruar gjithashtu ndikimin e tyre të mundshëm në shëndetin fizik dhe në sjelljen e tyre.
"Ne kërkuam në nëntë arkiva biomjekësore rishikime sistematike të botuara në anglisht nga viti 2013 deri në korrik 2021, mbi konsumimin e pijeve energjike me kafeinë nga individë nën 18 vjeç, duke kërkuar gjithashtu të dhëna përfaqësuese nga Britania", shkruajnë studiuesit. Sipas rezultateve, 13% deri në 67% e fëmijëve në mbarë botën kishin konsumuar pije energjike një vit më parë. Në mënyrë të ngjashme, analiza e të dhënave në Mbretërinë e Bashkuar tregon se 3% deri në 32% e fëmijëve britanikë konsumonin pije energjike të paktën një ditë në javë. "Konsumimi i shpeshtë, 5 ose më shumë ditë në javë, shoqërohet me shëndet të dobët mendor dhe fizik dhe mirëqenie të dobët të përgjithshme, në krahasim me ata që nuk i konsumojnë", vijon Khouja.
"Por, jo vetëm kaq. Nga të dhënat e rishikimeve sistematike, del një lidhje e drejtpërdrejtë midis pijeve energjike dhe vetëdëmtimit, vetëvrasjes, hiperaktivitetit, performancës së dobët dhe frekuentimit të shkollës".
Autorët përfundojnë: "Rezultatet e rishikimeve dhe të dhënave në Britaninë e Madhe sugjerojnë se djemtë pinë më shumë se vajzat, me konsum që rritet me moshën dhe shoqërohet me shtim të dhimbjes së kokës, pagjumësisë, konsumimit të alkoolit, duhanpirjes, nervozizmit dhe përjashtimit nga shkolla".
BMJ 2022. Doi: 10.1136/bmjopen-2020-047746
http://doi.org/10.1136/bmjopen-2020-047746