pri192022
Mbështetja e nënës dhe e foshnjës pas lindjes. OBSH-ja publikon udhëzimet e reja
Organizata Botërore e Shëndetësisë ka publikuar udhëzimet e saj kushtuar grave dhe të porsalindurve në gjashtë javët e para pas lindjes, një moment kritik për zhvillimin e foshnjës dhe për rikuperimin e plotë të mirëqenies së nënës.
"Lindja e një fëmije është një moment që ndryshon jetën, por që mund të shkaktojë edhe stres dhe ankth. Për këtë është e nevojshme që sistemet shëndetësore të ofrojnë mbështetje për prindërit, veçanërisht gratë, nevojat e të cilave shpesh neglizhohen pas lindjes", thotë Anshu Banerjee, drejtor i Departamentit të Shëndetit të Nënës, Neonatalit, Fëmijëve e Adoleshentëve dhe Plakjes në OBSH, duke shpjeguar se udhëzimet e reja detajojnë kohëzgjatjen minimale të qëndrimit në spital pas lindjes, duke ofruar udhëzime për kriteret e daljes nga spitali.
"Koha e shtrimit në spital do të varet nga rasti konkret i gruas dhe fëmijës, konteksti social, përvoja e lindjes dhe çdo problem shëndetësor", thuhet në dokumentin i cili specifikon se si rekomandohet ndjekja e mëtejshme në periudhën pas lindjes për gratë e shëndetshme dhe të porsalindurit e shëndetshëm ndërmjet 48 dhe 72 orëve, midis shtatë dhe 14 ditëve dhe gjatë javës së gjashtë pas lindjes. Nëse identifikohen rreziqe për shëndetin, do të kërkohet monitorim më i afërt, me trajtim potencialisht të nevojshëm përtej gjashtë javëve të para. "Gratë dhe familjet e tyre duan dhe kanë nevojë për një përvojë pozitive pas lindjes, që ndihmon në tejkalimin e sfidave fizike dhe emocionale që krijohen pas lindjes së një fëmije. Kjo është arsyeja pse nevojiten shërbime të përkushtuara pas lindjes për të mbështetur shëndetin fizik dhe mendor të nënave të reja, duke ofruar kujdes për të sapolindurit", përfundon Banerjee.
Por në një editorial komentues në The Lancet, Debora Bick (Shkolla Mjekësore Warwick në Koventri, Britani), shkruan: "Udhëzimet e OBSH-së përfshijnë rekomandime të rëndësishme për shëndetin e nënës dhe të porsalindurit, duke lënë pas dore si mbështetjen dhe ndërhyrjen përtej 6 javëve nga lindja, ashtu edhe integrimin e shërbimeve për të gjitha gratë dhe të sapolindurit, pa të cilat nuk ka gjasa që të arrihet reduktimi i vdekshmërisë dhe sëmundshmërisë".