nën82021
Dhimbja e kraharorit në urgjencë. Udhëzime të standardizuara për të kuptuar kush është në rrezik
Shqetësimet në kraharor, të lidhura me një atak në zemër ose me një event kardiak, shpesh mund të ndihet në zona të tjera përveç gjoksit, si shpatullat, krahët, nofullat, qafa, shpina dhe pjesa e sipërme e barkut dhe kjo justifikon një qasje shumëfaktoriale të ekzaminimit në urgjencë, sipas një udhëzimi të ri të përbashkët të Shoqatës Amerikane të Zemrës dhe Kolegjit Amerikan të Kardiologjisë, botuar në Circulation dhe në Journal of the American College of Cardiology.
"Ky është dokumenti i parë i fokusuar vetëm në vlerësimin dhe diagnostikimin e dhimbjes së gjoksit dhe u rekomandon mjekëve të përdorin vlerësime të standardizuara të rrezikut, metoda klinike dhe mjete të standardizuara për njerëzit me dhimbje gjoksi dhe për të komunikuar me ta", shpjegon Martha Gulati, nga Universiteti i Arizonës në Feniks, e cila drejtoi grupin e punës. Nga të gjithë të rriturit që vijnë në urgjencë me dhimbje gjoksi, vetëm rreth 5% vuajnë nga sindroma akute koronare. Më shumë se gjysma marrin në fund një diagnozë jo-kardiake për simptomat e dhimbjes së gjoksit, duke përfshirë problemet respiratore, muskuloskeletore, gastrointestinale, psikologjike dhe të tjera. Qëllimet fillestare të vlerësuesve duhet të jenë të identifikojnë shkaqet e dhimbjes që janë kërcënuese për jetën dhe të vlerësojnë nëse është i nevojshëm shtrimi në spital ose testimi i mëtejshëm. Udhëzuesi i ri u këshillon mjekëve të përdorin vlerësime standarde të rrezikut për të përcaktuar nëse një pacient është në rrezik të ulët, të mesëm ose të lartë për të pasur një ngjarje kardiake.
Një individ me rrezik të ulët për ngjarje kardiake, për shembull, mund të referohet për vlerësim shtesë në një mjedis ambulator, në vend që të shtrohet në spital. Ekspertët theksojnë gjithashtu se ka dallime mes burrave dhe grave kur përballen me situatën. Dhimbja e gjoksit është simptoma mbizotëruese dhe më e shpeshtë te të dyja gjinitë, por gratë kanë më shumë gjasa të kenë edhe simptoma shoqëruese, si të përziera dhe mungesë frymëmarrjeje. Autorët e udhëzuesit theksojnë se kjo do të ofrojë një mundësi për të reduktuar ekzaminimet e panevojshme ose të papërshtatshme për disa të rritur me dhimbje gjoksi, veçanërisht nëse mjekët mund të menaxhojnë frikën dhe shqetësimet e pacientëve përmes vendimmarrjes së përbashkët.
Circulation 2021. Doi: 10.1161/CIR.0000000000001030
https://doi.org/10.1161/CIR.0000000000001030