pri152021
Te fëmijët me diabet të tipit 1, hiperglicemia ka efekte të dëmshme mbi trurin
Përfundimet e një studimi të botuar në "Diabetes Care" sugjerojnë që diabeti i tipit 1 (DM1) mund të ndikojë në zhvillimin konjitiv të fëmijëve të vegjël, në korrelacion të ngushtë me hipergliceminë afatgjatë dhe afatshkurtër dhe se ai ka efekte që zgjasin në kohë. "Tashmë dihet se fëmijët me DM1 kanë dallimeve të konsiderueshme afatshkurtra në vëllimin dhe rritjen cerebrale", thotë bashkautori Allan Reiss, profesor në Universitetin e Stanfordit, në Kaliforni, i cili hulumtoi temën në bashkëpunim me Rrjetin e Kërkimeve mbi Diabetin te Fëmijët (DirecNet), një konsorcium me shumë qendra, i financuar nga Institutet Kombëtare të Shëndetit.
Studiuesit e DirectNet regjistruan 144 fëmijë me DM1 (mosha mesatare, 7 vjeç) dhe me një kohëzgjatje mesatare të sëmundjes prej 2.4 vjetësh. Grupi i kontrollit përbëhej nga subjekte të së njëjtës moshë, por pa diabet. Të gjithë pjesëmarrësit iu nënshtruan MRI-së cerebrale dhe testeve konjitive të përshtatshme për moshën, të përsëritura deri në katër herë në pak më shumë se gjashtë vjet ndjekje, si dhe dozimin tremujor të hemoglobinës së glikozuar (HbA1c) dhe monitorimin e vazhdueshëm të glukozës në gjak. Rezultatet? Individët me DM1 kishin koeficient inteligjence dhe koeficientë verbalë dukshëm më të ulët si në matjet bazë, ashtu edhe pas 8, 10 dhe 12 vjetësh, ndërkohë që vlerat neurokonjitive nuk u modifikuan konsiderueshëm gjatë ndjekjes.
Jo vetëm kaq: te diabetikët e moshës 6 deri në 12 vjeç, janë vëzhguar vëllime dukshëm të ulëta, krahasuar me kontrollet, në të gjitha vlerësimet e lëndës gri dhe të bardhë, me ndryshime që shtoheshin me kalimin e kohës. "Nevojiten studime të mëtejshme në dy fusha kryesore: e para, për të vlerësuar nëse dhe si truri dhe anomalitë konjitive që dalin nga këto rezultate mund të ndikojnë në rezultatet afatgjata arsimore dhe profesionale; e dyta, për të verifikuar nëse një kontroll i ngushtë dhe i hershëm i glicemisë, mund të ndalojë apo edhe të kthejë efektet që kemi vërejtur", përfundon Reiss-i.
Diabetes Care 2021. Doi: 10.2337/dc20-2125
https://doi.org/10.2337/dc20-2125