sht262023
Diabeti 2. Ngrënia e mëngjesit herët, një strategji efektive për reduktimin e rrezikut
Ngrënia e mëngjesit herët, para orës 8, mund të reduktojë rrezikun për zhvillimin e diabetit të tipit 2, sipas një studimi të kryer nga Instituti i Shëndetit Global në Barcelonë dhe të publikuar në "International Journal of Epidemiology". Studimi ndoqi më shumë se 100,000 pjesëmarrës francezë dhe arriti në përfundimin se rreziku për zhvillimin e diabetit mund të reduktohet jo vetëm duke modifikuar dietën, por edhe kohën në të cilën konsumohen vaktet. "Ne e dimë se koha në të cilën konsumohet vakti luan një rol kyç në rregullimin e ritmit cirkadian, kontrollin e glukozës dhe atë të lipideve, edhe pse studimet që kanë hetuar lidhjen midis kohës së ngrënies ose agjërimit dhe diabetit të tipit 2 kanë qenë të pakët", shpjegon autorja kryesore e studimit Anna Palomar-Cros.
Lidhja midis shpeshtësisë, kohës së vakteve dhe incidencës së diabetit të tipit 2 u analizua te 103,312 të rritur (79% gra) nga grupi francez NutriNet-Santé. Pjesëmarrësit plotësuan regjistrat e dietës online ku raportuan ushqimet e konsumuara gjatë një periudhe 24-orëshe për 3 ditë jo të njëpasnjëshme, duke përfshirë edhe kohën në të cilën i konsumonin këto ushqime. Duke vlerësuar shëndetin e pjesëmarrësve gjatë viteve në vijim, për një mesatare prej shtatë, pati 963 raste të reja të T2D. Rreziku i zhvillimit të sëmundjes ishte dukshëm më i lartë (59%) në grupin e njerëzve që mëngjesin e hanin rregullisht pas orës 9, krahasuar me ata që e hanin para orës 8 të mëngjesit. Ekipi hulumtues gjithashtu zbuloi se ngrënia e darkës vonë (pas orës 22) dukej se e rriste rrezikun, ndërsa ngrënia më e shpeshtë (rreth pesë herë në ditë) lidhej me një incidencë më të ulët të sëmundjes. Në anën tjetër, agjërimi i zgjatur rezultoi të jetë i dobishëm vetëm në rastet kur mëngjesi konsumohej herët dhe agjërimi zgjaste për më shumë se 13 orë gjatë natës (duke ngrënë një darkë herët).
"Rezultatet tona sugjerojnë që nëse vakti i parë konsumohet para orës 8 të mëngjesit dhe i fundit para orës 19:00 mund të jetë një strategji efektive për uljen e incidencës së diabetit të tipit 2. Nëse konfirmohet në studime të tjera në shkallë të gjerë, këto strategji mund të konsiderohen efektive për parandalimin e diabetit të tipit 2", përfundojnë autorët.
Int J Epidemiol. 2023 Jun 16. doi: 10.1093/ije/dyad081.
https://pubmed.ncbi.nlm.nih.gov/37328450/