jan242025

Transplantimi i mikrobiotës fekale, një terapi inovative për gastroenteropatinë diabetike

Artikuj lidhur

29-05-2024 | Diabeti. KE miraton insulinën e parë me administrim javor. Duartrokitet nga pacientët dhe shoqatat shkencore

23-05-2023 | Te diabetikët, insulinën mund ta prodhojnë edhe qelizat staminale të pankreasit

19-06-2019 | Insuficienca kardiake dhe diabeti melit i tipit 2, në disa raste, duhen trajtuar së bashku

Një studim i publikuar në EClinicalMedicine nga një grup studiuesish danezë të udhëhequr nga Katrine Lundby Høyer nga Spitali Universitar Aarhus ka treguar se transplantimi i mikrobiotës fekale (FMT) mund të jetë një trajtim i sigurt dhe efektiv për pacientët me diabet të tipit 1 dhe gastroenteropati diabetike.

Gastroenteropatia diabetike prek deri në një të katërtën e njerëzve me diabet të tipit 1, duke shkaktuar simptoma dobësuese si nauze, të vjella, fryrje dhe diarre. Këto simptoma vijnë si rezultat i dëmtimit nervor që ndikon në lëvizshmërinë e zorrëve dhe përbërjen e mikrobiotës intestinale dhe opsionet e trajtimit aktualisht janë të kufizuara.

Në studim morën pjesë 20 pacientë, të cilët u përzgjodhën në mënyrë rastësore për të marrë një dozë të vetme kapsulash që përmbanin feçe nga donatorët ose një placebo. Pas katër javësh, të gjithë pjesëmarrësit morën feçen e donatorëve. Rezultatet treguan një reduktim të konsiderueshëm të simptomave te pacientët e trajtuar me FMT, siç rezultoi pas matjeve me shkallën e vlerësimit të simptomave gastrointestinale (GSRS-IBS), me rezultate që u ulën nga 58 në 35. Në grupin e placebos, rezultatet u ulën nga 64 në 56. Cilësia e jetës në grupin e trajtuar me FMT u përmirësua në shkallën e ndikimit të sindromës së zorrës së irrituar (IBS-IS) nga 108 në 140, ndërsa në grupin e placebos u rrit nga 77 në 92. Efektet anësore ishin të lehta dhe jetëshkurtra dhe përfshinin diarre, fryrje, dhe dhimbje barku, pa efekte anësore serioze të raportuara.

Transplantimi i mikrobiotës fekale njihet tashmë si një trajtim efektiv për infeksionet e Clostridioides difficile, por kjo është hera e parë që testohet te pacientët me gastroenteropati diabetike. Ky studim tregon se trajtimi është i sigurt dhe efektiv, dhe gjithashtu ofron shpresë për një grup pacientësh që kanë më pak opsione të tjera trajtimi. Megjithatë, studiuesit theksojnë nevojën për studime të mëtejshme për të kuptuar efektet afatgjata dhe për të identifikuar se cilët pacientë mund të përfitojnë trajtimi.