jan232017
Terapia gjenike, perspektivat e reja të diskutuara në Firence
Sekuenca e parë e plotë e gjenomës njerëzore daton në vitin 2003 dhe sot pacientët kanë akses në barnat e para të aprovuara për terapinë gjenike. Për progreset dhe perspektivat e reja në këtë fushë të mjekësisë u diskutua në Firernze, gjatë Kongresit vjetor të Shoqatës europiane të terapisë gjenike dhe qelizore (Esgct). Eventi me titull "Ndryshimi i fytyrës së mjekësisë moderne: qelizat staminale dhe terapia gjenike" mblodhi në qendrën toskane më shumë se 1000 ekspertë. Në fakt pritshmëritë janë të mëdha dhe nga terapitë e para të destinuara për patologjitë e rralla, tani po fillohet të eksplorohen perspektiva të kurës për ato më të përhapurat si p.sh. për sëmundjet kardiovaskulare dhe tumoret.
Në Evropë, terapia e parë gjenike e aprovuar në maj 2016 fokusohet në trajtimin e Ada-Scid, një sëmundje e rrallë, ndërsa në gusht Komisioni Europian autorizoi tregtimin e kushtëzuar të terapisë së parë qelizore bazuar në inxhinierizimin e sistemit imunitar për trajtimin e leucemive dhe tumoreve të tjera të gjakut. Luigi Naldini, drejtori shkencor i Institutit San Raffaele-Telethon për terapinë gjenike (Tiget) dhe kërkues mbi vektorët e lentivirus dhe transferimin e gjeneve, ka bindjen se do të ketë zhvillime të mëtejshme: "Testet e fundit klinike ofrojnë prova konkrete për terapinë gjenike, e cila mund të ofrojë kura për sëmundje të rënda dhe invaliduese".
Është një sektor që "meriton të njihet më tepër nga komuniteti shkencor, mediat, bota e financës dhe shoqëria në përgjithësi", pohon Nathalie Cartier-Lacave, presidente e Esgct, e cila paralajmëron domosdoshmërinë për më shumë transparencë nga ana e kërkuesve.