maj212020
Coronavirusi dhe kurthi i problemeve mendore. Ja, ndërlikimet e mundshme
Individët me infeksion Sars-CoV-2 mund të kenë probleme psikiatrike gjatë shtrimit në spital dhe pas shërimit të tyre, sipas një studimi të botuar në "Lancet Psychiatry". "Shumica e njerëzve me Covid-19 nuk do të zhvillojnë ndonjë problem psikiatrik, por duke pasur parasysh numrin e madh të atyre që sëmuren, ndikimi i përgjithshëm në shëndetin mendor mund të jetë i konsiderueshëm", shpjegon Jonathan Rogers (Kolegji Universitar i Londrës), autori kryesor.
Studiuesit analizuan 65 studime të rishikuara dhe shtatë shqyrtime në pritje të rishikimit, për një numër të përgjithshëm prej mbi 3.500 individësh që kishin Sars, Mers dhe Covid-19. Studimet përfshinin vetëm raste të shtruara në spital dhe morën në konsideratë si simptoma akute gjatë sëmundjes, ashtu edhe rezultate afatgjata (nga dy muaj deri në 12 vjet). Gati një në tre vetë me Sars ose Mers zhvilluan çrregullim stresi post-traumatik gjatë një ndjekjeje mesatare tre-vjeçare, dhe rreth 15% e pjesëmarrësve paraqitën depresion dhe ankth një vit ose më shumë pas sëmundjes. Më shumë se 15% kanë përjetuar lodhje kronike, ndryshime të humorit, çrregullime të gjumit ose ulje të përqendrimit dhe kujtesës. Pothuajse 28% e njerëzve të shtruar në spital për Sars dhe Mers pësuan konfuzion dhe një pakicë e konsiderueshme e atyre me infeksione nga Covid-19 shfaqën simptoma të delirit, si konfuzion, nervozizëm dhe dëmtim të vetëdijes. "Ne duhet të hulumtojmë se cilët faktorë mund të kontribuojnë në shkaktimin e këtyre problemeve mendore dhe të zhvillojmë ndërhyrje për t'i parandaluar dhe trajtuar ata", përfundojnë autorët.
Iris Sommer (Qendra Mjekësore Universitare Groningen) dhe Roberto Bakker (Qendra Mjekësore e Universitetit të Mastrihtit), në një editorial shoqërues argumentojnë se rezultatet e studimeve mbi shpërthimet e mëparshme të coronaviruseve janë të dobishme, por mund të mos jenë parashikuese të sakta të përhapjes së komplikacioneve psikiatrike për pacientët me Covid-19. "Paralajmërimi që rrjedh nga ky studim, pra, se duhet të përgatitemi për të trajtuar një numër të madh pacientësh që zhvillojnë delir, çrregullim stresi post-traumatik, ankth dhe depresion, është megjithatë një mesazh i rëndësishëm për psikiatrin e zonës", përfundojnë editorialistët.
Lancet Psychiatry 2020. Doi: 10.1016/S2215-0366(20)30203-0
https://doi.org/10.1016/S2215-0366(20)30203-0
Lancet Psychiatry 2020. Doi: 10.1016/S2215-0366(20)30219-4
https://doi.org/10.1016/S2215-0366(20)30219-4