tet282020
Distancimi dhe maskat mund të ulin ngarkesën e virusit në qarkullim. Ja, se si...
Sipas një studimi të kryer nga Spitali Irccs Sacro Cuore Don Calabria në Negrar (Verona) dhe botuar në "Clinical Microbiology and Infection", përdorimi i maskave dhe respektimi i distancës fizike mund të bëjë që vala e dytë e Covid-19 të ketë një ndikim më të ulët në spitalet dhe njësitë e kujdesit intensiv, duke ulur sasinë e virusit në qarkullim.
Studiuesit analizuan 373 raste të Covid-19 që mbërritën në urgjencën e spitalit të tyre midis 1 marsit dhe 31 majit të fundit. "Për secilin rast, është vlerësuar me anë të një tamponi ngarkesa virale, më pas pacientët u ndoqën për të regjistruar ashpërsinë e simptomave dhe evolucionin e sëmundjes", ka thënë Dora Buonfrate, autore senior e studimit dhe Chiara Piubelli, autorja e tij kryesore. "Të dhënat e mbledhura tregojnë qartë se me uljen e qarkullimit të Sars-CoV-2 falë masave të kontrollit, përhapja e virusit është ulur dhe paralelisht, me një mijë herë, është ulur edhe ngarkesa virale e gjetur te pacientët", vazhdojnë ata. Pikërisht për këtë arsye, rastet që mbërritën në spital në maj kishin rënë në kontakt me sasi më të ulët të viruseve dhe për këtë arsye, kishin më pak qarkullim, kështu që ashpërsia e tyre ishte më e ulët.
"Në maj, pacientët kishin mesatarisht simptoma më pak të rënda Covid-19 dhe një gjasë më të ulët për komplikacione. Në të njëjtën kohë, përqindja e pacientëve që kishin nevojë për shtrim në kujdesin intensiv është ulur", shpjegojnë Buonfrate dhe Piubelli. Mbajtja në një nivel të ulët e qarkullimit të virusit dhe ekspozimi ndaj infektimit me përdorimin e maskave dhe respektimi i hapësirës mund të kenë një ndikim jo vetëm në numrin absolut të rasteve, por edhe në ashpërsinë e tyre, duke ndihmuar në mirëmbajtjen e departamenteve të Covid dhe ato të kujdesit intensiv nën pragun kritik të zënies së shtretërve spitalorë. Ekspertët theksojnë se pajtueshmëria me rregullat e distancimit shoqëror është thelbësore.
"Këto rregulla mund ta bëjnë vërtet valën e dytë më të kontrollueshme, duke zvogëluar presionin mbi sistemin shëndetësor kombëtar dhe duke u siguruar që shumica e rasteve të Covid-19 të mos përkeqësohen dhe të zgjidhen pa pasoja negative", përfundojnë autorët.
Clinical Microbiology and Infection 2020. Doi: 10.1016/j.cmi.2020.10.006
https://doi.org/10.1016/j.cmi.2020.10.006