mar312023
Astma alergjike, ekzema dhe lidhja shkak-pasojë me osteoartritin
Njerëzit me sëmundje atopike si astma ose ekzema mund të kenë një rrezik të shtuar për të zhvilluar osteoartrit dhe barnat e përdorura për të zbutur sinjalet fiziologjike të reaksioneve alergjike në trup mund të ndihmojnë në zvogëlimin e këtij problemi, sipas një studimi të botuar në "Annals of the Rheumatic".
"Provat në rritje sugjerojnë se aktivizimi i mastociteve dhe citokinave të përfshira në reaksionet alergjike mund të luajnë një rol kyç në zhvillimin e osteoartritit, por është e paqartë nëse njerëzit me astmë alergjike ose ekzemë mund të jenë në rrezik të shtuar për të zhvilluar osteoartrit", thotë autori kryesor i studimit Matthew Baker nga Universiteti Stanford, SHBA.
Për të hetuar më mbi këtë temë, studiuesit u mbështetën në pyetjet e paraqitura në një bazë të dhënash të sigurimit mbarëkombëtar në SHBA (Optum CDM) dhe krahasuan 109,899 njerëz me sëmundje atopike me 109,899 njerëz pa astmë alergjike ose ekzemë.
Rreziku për zhvillimin e osteoartritit gjatë një periudhe mesatare tetëvjeçare të ndjekjes ishte 58% më i lartë tek individët me astmë alergjike ose ekzemë krahasuar me ata pa sëmundje atopike.
Ky trend ishte edhe më i dukshëm në mesin e 4,325 njerëzve që kishin astmë alergjike dhe ekzemë, të cilët kishin dy herë më shumë mundësi të zhvillonin osteoartrit sesa ata pa sëmundje atopike. Për më tepër, 11,820 njerëzit që vuanin vetëm nga astma alergjike kishin 83% më shumë mundësi për të zhvilluar osteoartrit gjatë tetë viteve sesa ata me sëmundje pulmonare obstruktive kronike (COPD).
Më pas studiuesit krahasuan rrezikun për zhvillimin e osteoartritit midis pacientëve me dhe pa astmë/ekzemë alergjike duke përdorur në të dhënat shëndetësore elektronike të Stanford Research Repository (STARR) për të parë nëse rezultatet ishin të ngjashme. Në këtë rast, ekspertët studiuan 114,427 pacientë, duke përfshirë 43,728 me astmë ose ekzemë alergjike dhe 70,699 pa histori të sëmundjes atopike, dhe zbuluan se mundësitë për të zhvilluar osteoartrit ishin 42% më të larta në mesin e individëve me astmë ose ekzemë alergjike dhe 19% më të larta midis individëve me të dyja kushtet.
"Gjetjet tona ofrojnë mbështetje të mëtejshme për konceptin se rrugët alergjike mund të kontribuojnë në zhvillimin e osteoartritit", përfundojnë autorët.
Annals of the Rheumatic Diseases 2023. Doi: 10.1136/ard-2022-223640
http://doi.org/10.1136/ard-2022-223640