jan102023
Kanceri i gjirit. Efektet anësore të trajtimeve dhe reduktimi i tyre
Trajtimet rrisin mbijetesën e pacienteve me kancer gjiri, por mund të kenë efekte anësore negative që kanë një ndikim të thellë në shëndetin e tyre fizik dhe emocional, duke ulur cilësinë e jetës. Efektet anësore të dokumentuara mirë përfshijnë depresionin, lodhjen dhe rënien e formës fizike. Studiuesit mblodhën të dhëna nga 1,830 pacientë, në 18 studime të ndryshme të rishikuara nga kolegët dhe identifikuan tendencat e përgjithshme duke përdorur teknikat e analizës statistikore. Ata zbuluan se ndërhyrjet e kombinuara të ushtrimeve aerobike dhe rezistente përmirësonin funksionin kardiorespirator, qëndrueshmërinë e muskujve, forcën, cilësinë e jetës dhe reduktonin depresionin.
Ushtrimet fizike i ndihmojnë pacientet me kancer të gjirit që t'i menaxhojnë efektet anësore fizike dhe mendore të trajtimit dhe të përmirësojnë prognozën e sëmundjes. Këtë e ka mbështetur një rishikim sistematik dhe metaanalizë e botuar në Nature Scientific Reports, që shqyrtonte efektet e aktivitetit fizik te pacientet që i nënshtroheshin trajtimit pas operacionit, domethënë, terapi ndihmëse me kimioterapi, radioterapi dhe terapi hormonale.
Rezultatet zbuluan gjithashtu se kombinimi i ushtrimeve mund të përmirësojë ndjeshëm lodhjen te pacientët me kancer gjiri, gjë që është e rëndësishme duke pasur parasysh se ky efekt anësor thuhet se prek midis 62% dhe 85% të pacientëve që i nënshtrohen trajtimit.
Studimi arrin në përfundimin se duke reduktuar efektet anësore negative, këto ndërhyrje mund të rrisin shkallët e respektimit të trajtimit, pra, efikasitetin e trajtimit dhe në fund të përmirësojnë prognozën e sëmundjes.
Dr. Paolo Levantino
Farmacist klinik dhe gazetar klinik
Burimi:
Scientific Reports (2022). DOI: 10.1038/s41598-022-07446-3