qer232023
Menopauza. Efektet e terapisë hormonale me estrogjen në presionin e gjakut
Gratë mbi 45 vjeç që marrin terapi hormonale me estrogjen kanë më shumë mundësi të zhvillojnë hipertension krahasuar me ato që përdorin formulime transdermale ose vaginale, sipas një studimi të botuar në "Hypertension".
"Ne e dimë se estrogjeni i administruar në rrugë orale metabolizohet përmes mëlçisë, proces i cili rrit faktorët që mund të çojnë në rritje të presionit të gjakut. Ne gjithashtu e dimë se gratë në postmenopauzë kanë një rrezik më të lartë për të zhvilluar presion të lartë të gjakut sesa gratë para menopauzës, dhe studimet e mëparshme kanë treguar se lloje të veçanta të terapisë hormonale shoqërohen me norma më të larta të sëmundjeve kardiovaskulare", thotë autorja kryesore e studimit Cindy Kalenga nga Universiteti i Calgaryt në Alberta, Kanada.
Studiuesit vlerësuan se si disa faktorë të lidhur me terapinë hormonale, si rruga e administrimit (orale ose jo) dhe lloji i estrogjenit, mund të ndikojnë në presionin e gjakut. Ata analizuan të dhënat e 112,000 grave mbi 45 vjeç, të cilat iu nënshtuan terapisë hormonale vetëm me estrogjen për një cikël prej të paktën gjashtë muajsh. Dy format më të zakonshme të estrogjenit të përdorura nga pjesëmarrëset ishin estradioli dhe estrogjeni i konjuguar.
Analiza zbuloi se gratë që morën terapi me estrogjen në rrugë orale kishin një rrezik 14% më të lartë për të zhvilluar hipertension krahasuar me ato që morën estrogjen transdermal, dhe një rrezik 19% më të lartë për të zhvilluar hipertension krahasuar me ato që përdorën kremra vaginale me përmbajtje estrogjeni. Pas llogaritjes së moshës, lidhja rezultoi të ishte më e fortë midis grave më të reja se 70 vjeç sesa midis atyre më të vjetra se 70 vjeç. Krahasuar me estradiolin, estrogjeni i konjuguar u shoqërua me një rritje prej 8% të rrezikut për rritjen e presionit të gjakut. Për më tepër, marrja e estrogjenit për një periudhë më të gjatë kohore ose marrja e tij në doza më të larta shton rrezikun për rritjen e presionit të gjakut.
"Rezultatet e studimit sugjerojnë se nëse një grua në menopauzë merr terapi hormonale, është që mjeku i saj të marrë parasysh llojet e estrogjeneve që mund të kenë rreziqe më të ulëta kardiovaskulare", përfundojnë autorët.
Hypertension 2023. Doi: 10.1161/HYPERTENSIONAHA.122.19938
https://doi.org/10.1161/HYPERTENSIONAHA.122.19938