shk282022
Koliti ulceroz. Diagnoza është e mundur me një analizë të thjeshtë gjaku
Në një studim të botuar në Clinical Gastroenterology and Hepatology është identifikuar një shënjues i mundshëm diagnostik për kolitin ulceroz.
"Ne zbuluam se pacientët me sëmundje inflamatore të zorrëve, veçanërisht kolit ulceroz, kishin nivele të larta të antitrupave të programuar për të synuar receptorët e proteinës C endoteliale", shpjegoi Yoichi Kakuta, nga Shkolla e Mjekësisë e Universitetit Tohoku në Japoni, autori i parë i artikullit. Rezultatet e studimit mund të çojnë drejt zhvillimit të një analize gjaku me anë të së cilës mund të identifikohet koliti ulceroz dhe gjithashtu, përparimi i tij. Anti-EPCR-të (EPR: endothelial protein C receptor), janë antitrupa, prania e të cilëve konsiderohet një shenjë dalluese e sëmundjeve autoimune. Më parë, studiuesit kishin gjetur tashmë antitrupa të tillë te pacientët me arteritin Takayasu, një sëmundje që çon në inflamacion të enëve të gjakut. Në studimin e ri, ata donin të kuptonin lidhjen e tij me kolitin ulceroz. Kjo është një sëmundje inflamatore e zorrëve, si sëmundja Crohn. Në mbarë botën, mbi 5 milionë njerëz vuajnë nga sëmundja inflamatore e zorrëve, diagnostikimi i së cilës përfshin teste invazive, si kolonoskopia. Studimi analizoi mostrat e gjakut nga 303 pjesëmarrës nga Japonia dhe Shtetet e Bashkuara, duke përfshirë 203 me sëmundje inflamatore të zorrëve. Kështu, u zbulua se pacientët me këtë sëmundje shfaqnin në mënyrë specifike antitrupa në krahasim me subjektet e shëndetshme dhe ata me sëmundje të tjera kolorektale. Ndjeshmëria ishte veçanërisht e lartë në rastin e njerëzve me kolit ulceroz. Për më tepër, shumica dërrmuese e pacientëve (mbi 93%) me kolit ulceroz, artrit ose sëmundje të lëkurës të lidhura me imunitetin, rezultuan pozitivë për antitrupat. Studiuesit tani duan të kuptojnë se si përfshihen këta antitrupa në zhvillimin e kolitit ulceroz. Qëllimi është të arrihet të zhvillohet një analizë gjaku për diagnostikimin e sëmundjes dhe trajtimet e mundshme.
"Kur një pacient me simptoma të tilla si diarre ose jashtëqitje me gjak, konsultohet me një klinikë të përgjithshme, do të ishte e lehtë të diagnostikohej koliti ulceroz duke kontrolluar përqendrimin e antitrupave në gjak", tha Kakuta, duke shtuar se përcaktimi i një diagnoze të shpejtë do të bëjë të mundur që pacienti të shkojë te një specialist sa më shpejt të jetë e mundur.
Clinical Gastroenterology and Hepatology 2021. Doi: 10.1016/j.cgh.2021.12.035.
https://doi.org/10.1016/j.cgh.2021.12.035