qer212024
Një i rritur nga pesë ka akoma simptoma të Covid-19, edhe pas tre muajsh
Në një studim të koordinuar nga Elizabeth C. Oelsner u evidentuan faktorë të rëndësishëm të lidhur me kohën e shërimit, duke ofruar të dhëna kryesore për trajtimin dhe parandalimin e Long Covid. I publikuar në JAMA Network Open, në të u evidentua se më shumë se një i rritur nga pesë nuk arrin të shërohet plotësisht nga infektimi me SARS-CoV-2 brenda 90 ditësh. Në të u përfshinë 4.708 pjesëmarrës dhe u analizua koha mesatare e shërimit, duke identifikuar vaksinimin dhe infektimin gjatë valës së Omicron, si elemente që nxisin shërimin e plotë.
Në studim u përdor një dizajn prospektiv, bazuar në 14 grupe të financuara nga Institutet Kombëtare të Shëndetësisë në SHBA (NIH), të cilat i ndjekin pjesëmarrësit që prej vitit 1971. Të dhënat e grumbulluara deri më 28 shkurt 2023 përfshinë individë të rritur në moshën mesatare 18 vjeç e lart, të cilët e kishin raportuar vetë infektimin me SARS-CoV-2. Rezultati kryesor ishte probabiliteti për të mos u shëruar brenda 90 ditësh.
Nga pjesëmarrësit, 22.5% nuk u shëruan brenda 90 ditësh nga infektimi. Gratë dhe individët me sëmundje kardiovaskulare paraekzistuese shfaqën kohë shërimi më të gjata, ndërsa vaksinimi dhe infektimi gjatë valës së Omicron lidheshin me kohë shërimi më të shkurtra.
"Studimi ynë sugjeron se vaksinimet dhe infektimet më pak të rënda gjatë valës së Omicron lidheshin me një shërim më të shpejtë nga Covid-19", shprehet Oelsner.
Si përfundim, ky studim ofron një tablo të qartë të sfidave të lidhura me shërimin nga Covid-19 dhe sugjeron se ndërhyrjet e synuara, si vaksinimi, mund të luajnë një rol thelbësor në zbutjen e simptomave persistente të Long Covid.