Alzheimer, ekspertët europian në kërkim të një standarti mbi terapitë

Kostoja e kërkimit dhe e zhvillimit të principeve të reja aktive është veçanërisht e lartë në neurologji, sidomos në fushën e demencës, meqë patologjitë e këtij sektori janë veçanërisht komplekse. Kjo ishte një nga tematika e diskutuara në takimin e dytë ndërkombëtar të programit "Dementia Integrated Development" që u zhvillua në Romë me pjesëmarrjen e ekspertëve akademikë dhe përfaqësuesve të autoriteteve rregullatore nga Mbretëria e Bashkuar, Japonia, Kanadaja, SHBA-ja, Danimarka, Gjermania, Zvicra dhe nga Agjencia Evropiane e Barnave. "Jemi të ndërgjegjshëm për vështirësitë që kompanitë farmaceutike hasin në këtë kontekst. Provat klinike mbi terapi të mundshme për Alzheimerin kanë kërkuar investime prej dhjetëra miliardë dollarësh, por që gjithsesi kanë dështuar në të paktën 200 raste. "Një sfidë që ne shkencëtarët dhe autoritetet rregullatore duam të marrim përsipër është gjetja e metodave të reja shpresëdhënëse në luftën kundër demencës dhe jo thjesht një mjekim të efekteve të saj", shprehet Luca Pani, Drejtor i përgjithshëm AIFA-s. Rreziku qëndron te mos investimi. Një risk i këtij lloji mund të largohet vetëm nëpërmjet një sforcimi të përbashkët për të mbledhur dhe për të ndarë me shpejtësi të dhëna epidemiologjike, klinike dhe neurobiologjike të cilat lejojnë të vlerësohen biomarkatorët, kriteret e reja diagnostikuese dhe matjet përfundimtare. "Nga barnat e reja aktualisht në zhvillim nuk priten mrekulli, disa molekula do të jenë të disponueshme në treg ndërmjet viteve 2018 dhe 2020 dhe do jenë në gjendje që të ngadalësojnë përparimin e simptomave, pra të zgjasin më shumë kohën që nevojitet nga diagnoza në humbjen e autosufiçensës te personi. Ky hark kohor nuk është njësoj për të gjithë dhe gjithsesi mund të kërkojë mjekime të ndryshme në varësi të rastit. Impenjimi i agjencive rregullatore të përfshira duhet të japë një model sa më të unifikuar të mundshëm të standardeve. Nga ky këndvështrim roli i agjencive mbi vlerësimin dhe sigurinë e barnave të reja dhe mbi verifikimin e faktit se provat shkencore janë konfirmuar nga praktikat klinike është shumë më i lartë.  Për të vendosur terapinë në një kontekst real, parametri për t'u përdorur është ai i vlerës së terapisë para kostos së saj monetare. Kjo e dhënë është shumë e ndryshueshme në funksion të realiteteve asistenciale, pikërisht për këtë është e nevojshme që të punohet shumë për përcaktimin e një standardi, përfundon Valentina Mantua psikiatre dhe drejtuese në AIFA.