nën272020
Përdhesi dhe shtimi i rrezikut kardiovaskular. Krahasim mes dy terapive
Sipas një studimi të botuar në "Lancet", terapia me febuxostat nuk është inferiore ndaj asaj me alopurinol në trajtimin e pacientëve me përdhes, përsa iu përket rezultateve kardiovaskulare dhe përdorimi i tij afatgjatë nuk është i lidhur me një shtim të rrezikut të vdekjes apo të ngjarjeve të kundërta të rënda, krahasuar me alopurinolin. "Përdorimi i febuxostatit ka qenë i kufizuar për shkak të dyshimit se shtonte ngjarjet kardiovaskulare, rezultat ky i studimit amerikan, Cares. Nga ana tjetër, hulumtimi ynë shpërndau dyshimet në lidhje me sigurinë kardiovaskulare të krahasuar të të dyja barnave, duke demonstruar ekuivalencën e tyre përsa i përket vdekjes kardiovaskulare, shtrimit në spital për infarkt dhe iktus cerebrovaskular", thotë Raffaele De Caterina, nga Universiteti i Pizës, bashkautor i studimit.
Studiuesit regjistruan 6,128 pacientë me moshë mesatare 71 vjeç, nga të cilët, 2,046 me sëmundje të mëparshme kardiovaskulare, në Mbretërinë e Bashkuar, Danimarkë dhe Suedi. Pacientët po trajtoheshin tashmë me alopurinol, kishin të paktën një faktor shtesë të rrezikut kardiovaskular dhe u përzgjodhën në mënyrë rastësore për të vazhduar të marrin alopurinol, ose për të kaluar në febuxostat. Janë përjashtuar subjektet që kishin pasur infarkt miokardi ose iktus gjatë gjashtë muajve të mëparshëm ose që kishin insuficiencë kardiake kongjestive ose insuficiencë të rëndë renale. Në fund të studimit, 189 pacientë në grupin febuxostat dhe 169 në grupin alopurinol u tërhoqën nga studimi.
Lidhur me rezultatin primar, një përbërje e shtrimit në spital për infarkt miokardi jofatal ose sindromë koronare akute pozitive për bioshenjuesit, iktus jo fatal ose vdekje kardiovaskulare, febuxostati nuk ishte inferior ndaj alopurinolit. Në grupin e febuxostatit, 222 pacientë vdiqën dhe 1720 patën të paktën një ngjarje të rëndë anësore (23 ngjarje të lidhura me trajtimin, në 19 pacientë). Në grupin e alopurinolit, 263 pacientë vdiqën dhe 1,812 përjetuan një ose më shumë ngjarje anësore serioze (5 ngjarje të lidhura me trajtimin, në 5 pacientë). Terapia e rastësishme u ndërpre në 973 pacientë në grupin e febuxostatit dhe 503, në grupin e alopurinolit.
Lancet 2020. Doi: 10.1016/S0140-6736(20)32234-0
https://doi.org/10.1016/S0140-6736(20)32234-0