sht292022
Kardiomiopatia hipertrofike. Ekzaminimi i zgjeruar mund të identifikojë të rrezikuarit nga vdekja e papritur
Pothuajse nëntë nga dhjetë rastet e vdekjes së papritur kardiake të shkaktuar nga kardiomiopatia hipertrofike (HCM) te të rinjtë paraprihen nga simptomat kardiake, anomalitë në EKG ose një histori familjare pozitive e problemeve të zemrës, sipas një studimi të ri të botuar në PLOS ONE.
"HCM-ja është një sëmundje kardiovaskulare gjenetike që mendohet se prek një në 500 individë në popullatën e përgjithshme. Edhe pse vdekja e papritur për shkak të HCM-së është e rrallë, ajo është një ndër shkaktarët kryesorë të vdekjes në mënyrë natyrore te të rinjtë", shpjegon autori kryesor i studimit Erik Börjesson nga Spitali Universitar Sahlgrenska në Suedi.
"Identifikimi i pacientëve të rrezikuar mund të zvogëlojë rrezikun duke kufizuar ushtrimet fizike dhe terapitë me barna, apo implantimin e defibrilatorëve", vijon eksperti.
Studiuesit analizuan të gjitha rastet e vdekjes së papritur me HCM në periudhën 2000-2010 në Suedi në mesin e individëve nën 35 vjeç. Më pas ata vlerësuan simptomat klinike, historinë mjekësore, historinë familjare dhe gjetjet e EKG-së përpara shfaqjes së ngjarjes duke përdorur të dhënat nga regjistrat kombëtarë, raportet e autopsisë, të dhënat mjekësore dhe intervistat me të afërmit pas vdekjes.
Nga 38 rastet e identifikuara të vdekjes së papritur kardiake, që përfshinin 31 meshkuj dhe 7 femra, 71% e tyre kishin simptoma të mundshme kardiake, ndër të cilat: dhimbje torakale dhe palpitacion para vdekjes, dhe 69% e tyre morën trajtim mjekësor në 180 ditët para vdekjes, krahasuar me 21% të kontrolleve.
39% e të prekurve kishin një çrregullim të njohur kardiak para vdekjes dhe 50% e tyre kishin një histori familjare pozitive për sëmundje kardiovaskulare. Nga 28 individët që kishin bërë vlerësimin e EKG-së në një moment të jetës së tyre, 23 prej tyre (82%) kishin rezultate të cilat konsideroheshin jonormale. "Shumica e të rinjve që vdesin nga ky shkak kanë një ose më shumë anomali që mund të dallohen gjatë ekzaminimit kardiak", theksojnë ekspertët. Rezultatet e studimit sugjerojnë se ekzaminimi kardiak edhe tek ata që nuk janë atletë konkurrues në moshë shkollore mund të ndihmojë në parandalimin e vdekjes së papritur në popullatën e re me HCM.
PLOS ONE 2022. Doi: 10.1371/journal.pone.0273567
http://doi.org/10.1371/journal.pone.0273567