mar142023
Bypass-i koronar. Gratë janë më të rrezikuara për rezultate negative
Sipas një studimi të botuar në "JAMA Surgery", gratë janë dukshëm më të rrezikuara për rezultate negative pas kirurgjisë së bypass-it koronar dhe gjatë dekadës së fundit nuk është vënë re asnjë përmirësim domethënës në këtë aspekt.
"Disa studime në të kaluarën kanë raportuar se gratë që i nënshtrohen bypass-it koronar kanë vdekshmëri dhe sëmundshmëri më të lartë krahasuar me burrat, por ka qenë e paqartë nëse ky ndryshim ishte zvogëluar me kalimin e kohës. Për të sqaruar më mirë situatën, ne shqyrtuam tendencat në rezultatet e grave që iu nënshtruan bypass-it koronar në SHBA, në periudhën 2011-2020", shpjegon Mario Gaudino nga Weill Cornell Medicine në Nju Jork, autori kryesor i studimit.
Studiuesit studiuan 1,297,204 pacientë të cilët i ishin nënshtruar bypass-it koronar. Rezultati primar ishte vdekshmëria operative, ndërsa rezultati sekondar ishte një kombinim i vdekshmërisë operative, iktusit, insuficiencës renale, rindërhyrjes kirurgjikale, infeksionit të plagës së thellë të sternës, ventilimit të zgjatur mekanik dhe qëndrimit të zgjatur në spital.
Ekspertët vunë re se gratë kishin një vdekshmëri operative më të lartë dhe një incidencë të përgjithshme të rezultatit të përgjithshëm të vdekshmërisë dhe sëmundshmërisë operative, krahasuar me burrat.
Rreziku që i atribuohet grave për vdekshmërinë operative varionte nga 1,28 në 2011 në 1,41 në 2020, pa asnjë ndryshim të rëndësishëm gjatë periudhës së studimit. Rreziku i atribuar për vdekshmërinë dhe sëmundshmërinë operative ishte 1.08 si në vitin 2011 ashtu edhe në vitin 2020 pa asnjë ndryshim të rëndësishëm gjatë periudhës së studimit.
Në një editorial të lidhur, Brittany Zwischenberger nga Qendra Mjekësore e Universitetit Duke në Durham dhe Jennifer Lawton nga Universiteti Johns Hopkins në Baltimore, thonë se ky studim duhet të jetë me interes për të gjithë mjekët që kujdesen për këto gra. "Përvoja jonë kolektive thekson se ekziston një nevojë imediate për një qasje gjithëpërfshirëse dhe të qëllimshme për të përmirësuar sëmundshmërinë dhe vdekshmërinë te gratë që i nënshtrohen kirurgjisë së bypass-it koronar", përfundojnë editorialistet.
JAMA Surgery 2023. Doi: 10.1001/jamasurg.2022.8156
http://doi.org/10.1001/jamasurg.2022.8156
JAMA Surgery 2023. Doi: 10.1001/jamasurg.2022.8163
http://doi.org/10.1001/jamasurg.2022.8163