mar162021
Diabeti. Një dozë semaglutid 2.4 mg përmirëson rënien në peshë
Te të rriturit me mbipeshë ose obezë dhe me diabet të tipit 2, administrimi i semaglutidit 2.4 mg një herë në javë ka sjellë një rënie më të madhe dhe klinikisht të rëndësishme të peshës trupore krahasuar me placebon. "Ne vlerësuam efikasitetin dhe sigurinë e semaglutidit subkutan me dozë 2.4 mg një herë në javë kundrejt semaglutidit me dozë 1.0 mg, që është aprovuar për trajtimin e diabetit dhe placebos, për menaxhimin e peshës te të rriturit me mbipeshë ose obezitet dhe diabet të tipit 2", shpjegon Melanie Davies, nga Universiteti i Leicesterit, autorja e parë e studimit të botuar në "Lancet".
Studiuesit regjistruan nga 149 klinika ambulatore në 12 vende në Evropë, Amerikën e Veriut, Amerikën e Jugut, Lindjen e Mesme, Afrikën e Jugut dhe Azi, të rritur me indeks të masës trupore të paktën 27 kg/m² dhe hemoglobinë të glikozuar 7-10%, të cilët ishin diagnostikuar me diabet të tipit 2 të paktën 180 ditë më parë. Pacientët, të shtresëzuar sipas barnave hipoglicemizuese bazë për uljen e glukozës dhe në bazë të hemoglobinës së glikozuar, u përzgjodhën në mënyrë rastësore për të marrë një injeksion subkutan të semaglutidit 2.4 mg ose semaglutidit 1.0 mg, ose placebo të padallueshëm vizualisht nga substanca aktive, një herë në javë për 68 javë, si dhe bënë një ndërhyrje në stilin e jetës.
U vlerësuan 1,595 pacientë, nga të cilët 1,210 u përfshinë në analizën e qëllimit për të trajtuar. Ndryshimi i vlerësuar në peshën mesatare të trupit nga fillimi deri në javën 68 ishte -9.6% me semaglutidin 2.4 mg, krahasuar me -3.4% me placebon. Në javën 68, 267 nga 388 pacientë të trajtuar me semaglutid 2.4 mg krahasuar me 107 nga 376 të trajtuar me placebo, arritën rënie në peshë prej të paktën 5%.
Ngjarjet anësore ishin më të shpeshta me semaglutidin 2.4 mg dhe 1.0 mg sesa me placebon; Ngjarje të padëshiruara gastrointestinale, kryesisht të lehta deri të moderuara, u raportuan te 256 nga 403 pacientë me semaglutid 2.4 mg, 231 nga 402 me semaglutid 1.0 mg dhe 138 nga 402 me placebo.
Lancet 2021. Doi: 10.1016/S0140-6736(21)00213-0
https://doi.org/10.1016/S0140-6736(21)00213-0