sht32024
Covid-19. Shfaqet varianti i ri i quajtur Xec
Ky variant quhet Xec dhe në muajt e ardhshëm mund ta ndryshojë pamjen aktuale të varianteve të Covid-19 në vende të botës që kanë pasur valë intensive të lëvizjes. I shfaqur për herë të parë në Berlin në fund të qershorit, Xec është një variant rikombinues dhe është i pranishëm tashmë në 3 kontinente. Që nga rasti i parë, ai është përhapur shumë shpejt në Evropë, Amerikë të Veriut dhe Azi, si dhe vazhdon të përhapet. Duket se ai është një sfidues i mundshëm i varianteve që mbizotërojnë aktualisht (KP.3.1.1 dhe nënvariantet e tij).
"Ajo që të bën përshtypje është avantazhi i rritjes që po shfaqet në nivel botëror dhe që vlerësohet me 3.8% në ditë (27% në javë), krahasuar me variantet e JN.1 që kanë pësuar tashmë mutacione", thekson eksperti i të dhënave Mike Honey. Sipas këtij të fundit, ky variant duket se ka rritjen më të shpejtë që ne dimë. Deri para pak kohësh u raportuan afro 111 kampione të këtij varianti nga 15 shtete në 3 kontinente. Izraeli dhe Spanja kanë raportuar së fundmi rastet e para.
Xec është një ndërthurje e dy varianteve të ndryshme: KS.1.1 (një variant i ashtuquajtur FLiRT) dhe KP.3.3 (varianti FLuQE) dhe sipas Honey, ky version i ri i Sars-CoV-2 mund të jetë veçanërisht i avantazhuar nga një mutacion i pazakontë i tij (T22N), i kombinuar me ato që karakterizojnë variantet më të shpejta. Përhapja e tij ishte më e madhe në Gjermani, e cila mendohet se është edhe origjina e tij, por prania e Xec po vërehet edhe në Danimarkë dhe Holandë.