kor42024
EMA miraton vaksinat e reja për virusin respirator sincicial dhe virusin Chikungunya
Agjencia Evropiane e Barnave (EMA) ka miratuar dy vaksina të reja. E para, mResvia, është një vaksinë mARN kundër virusit respirator sincicial (RSV) për të rriturit në moshat 60 vjeç e lart. Kjo vaksinë është e para në llojin e saj që synon një patogjen tjetër përveç Sars-CoV-2. E dyta është një vaksinë kundër virusit Chikungunya, e cila është e projektuar për individët 18 vjeç e lart. Chikungunya nuk është endemike në BE, por ndryshimet klimatike kanë shkaktuar një shtim të pranisë së mushkonjave potencialisht bartëse të virusit, sidomos të Aedes Albopictus dhe Aedes Aegypti. Këto vendime u morën në bazë të opinionit pozitiv të shprehur nga Komiteti i Barnave për Përdorim Mjekësor (CHMP) në EMA.
Gjithashtu, Moderna lajmëroi se CHMP ka shprehur mendim pozitiv për autorizimin e futjes në treg të mARN-1345, një vaksinë tjetër mARN kundër RSV. Kjo vaksinë është projektuar për të rriturit 60 vjeç e lart, me qëllim parandalimin e sëmundjeve të traktit respirator të shkaktuara nga infektimi me RSV. mARN-1345 i mbron të rriturit më të mëdhenj në moshë nga efektet e rënda të RSV dhe është e vetmja vaksinë e disponueshme në një shiringë të mbushur më parë, në një dozë të vetme, gati për përdorim, me qëllim lehtësimin e administrimit, duke u kursyer kohë operatorëve shëndetësorë dhe duke reduktuar gabimet. Opinioni pozitiv i CHMP mbi vaksinën mARN-1345, bazohet në rezultatet pozitive të eksperimentimit klinik të Fazës 3, i quajtur ConquerRSV. Ky studim botëror u krye mbi afro 37.000 vetë të rritur të moshave 60 vjeç e lart në 22 shtete. Analiza parësore me një kontroll ecurie mesatar prej 3.7 muajsh, shfaqi një efikasitet të vaksinës (VE) kundër sëmundjeve të rrugëve të poshtme të frymëmarrjes (LRTD) nga RSV në 83.7%. Në një analizë plotësuese me një kontroll ecurie mesatar prej 8.6 muajsh, mARN-1345, shfaqi efikasitet të zgjatur, me VE në 63.3% kundër RSV-LRTD, me dy ose më shumë simptoma. Efektet anësore më shpesh të shfaqura ishin dhimbja në vendin e injeksionit, lodhja, dhimbja e kokës, mialgjia dhe artralgjia.