kor122021
Alzheimeri. FDA-ja e kufizon barin e ri, vetëm për ata që kanë simptoma të lehta
Një muaj pas miratimit të tij të diskutueshëm, Administrata e Ushqimit dhe Barnave (FDA) vendosi të kufizojë indikacionet për përdorimin e barit të ri për Alzheimerin (aducanumab), duke e kufizuar atë vetëm për ata me simptoma të lehta, ose në fazat e hershme të sëmundjes. Vendimi vjen pas kritikave të ngritura nga shumë ekspertë dhe për të shmangur konfuzionin midis mjekëve dhe pacientëve rreth faktit se kush duhet të ketë barin, specifikon organi rregullator amerikan. Lajmin e raportojnë disa media amerikane, përfshirë New York Times-in.
Ky është një ndryshim i madh, duke qenë se fillimisht, sipas udhëzimeve të FDA-së, bari ishte aprovuar për të sëmurët me Alzheimer në përgjithësi. Polemikat i ka ndezur edhe çmimi i medikamentit (56,000 dollarë në vit) dhe përfitimet e tij të dyshimta. Tre konsulentë të jashtëm të FDA-së u mënjanuan nga vendimi, duke e quajtur atë "miratimin më të keq gjatë viteve të fundit në historinë e SHBA-së".
Bari nuk ka treguar që e ngadalëson ose ndalon ndjeshëm sëmundjen. Megjithatë, sipas agjencisë amerikane, aftësia e tij për të reduktuar formimin e pllakave në tru, mund të ngadalësojë demencën.