gus72019
Shumë pacientë nuk marrin statina nga frika e efekteve anësore. Strategjitë për mjekët
Megjithëse udhëzimet kombëtare tregojnë qartë se statinat mund të reduktojnë rrezikun e infarktit dhe iktusit, shumë pacientë që mund të përfitonin prej tyre, nuk i marrin. Më shumë se gjysma e pacientëve të përshtatshëm deklarojnë se kurrë nuk janë trajtuar me barna për uljen e kolesterolit dhe se kanë përjetuar efekte anësore ose frikën se do të bien viktima, të cilat janë arsye për ta ndërprerë ose refuzuar këtë lloj terapie, sipas një studimi të botuar në "Journal of the American Heart Association".
"Duhet t'i përqendrojmë përpjekjet tona në përmirësimin e mënyrës se si mjekët identifikojnë pacientët që duhet të trajtohen me një statinë dhe se si ata japin informacion për pacientët, që të mos humbasim asnjë mundësi për të përmirësuar shëndetin e zemrës", thotë Corey Bradley (Instituti i Kërkimeve Klinike "Duke" në Durham SHBA), autori kryesor i studimit. Për të zbuluar nëse pacientët e përshtatshëm përdorin statina dhe përse nganjëherë refuzojnë apo ndërpresin barnat, studiuesit kanë intervistuar 5.693 të rritur me moshë mesatare 68 vjeç, që shkonin në disa klinika kardiologjike, të kujdesit parësor ose endokrinologjike. Kështu, nga 1.511 njerëz (26.5%) që nuk po merrnin statina, 59.2% raportuan se ato nuk u ishin dhënë asnjëherë. Pacientët që raportonin se nuk kishin dëgjuar kurrë të flitej për trajtimin me statina ishin gra (22% më shumë), njerëz të racës së zezë (48% më shumë) ose të pasiguruar (38% më shumë).
Pacientët e vëzhguar në klinikat e kardiologjisë kishin më shumë gjasa të merrnin një statinë sesa ata që u intervistuan në klinikat e kujdesit parësor. "Ekziston mundësia që disa njerëz të mos kujtojnë se mjeku u ka ofruar një statinë, pra, mund ta kemi mbivlerësuar përqindjen e njerëzve të cilëve nuk u është ofruar asnjëherë ky bar. Megjithatë, ne besojmë se nëse pacienti nuk e mban mend bisedën, diskutimi ndoshta nuk ishte efektiv", thotë Bradley. Ndër pacientët që i refuzuan (10.1%) apo i ndërprenë (30.7%) statinat, arsyet më të zakonshme ishin frika nga efektet anësore dhe efektet anësore të perceptuara.
"Mjekët nuk duhet të hezitojnë t'i rikthehen bisedës për fillimin e terapisë së re me statina te pacientët që mund të përfitojnë, por që aktualisht nuk i marrin këto barna", përfundojnë autorët.
J Am Heart Assoc. 2019. doi: 10.1161/JAHA.118.011765
https://www.ncbi.nlm.nih.gov/pubmed/30913959