sht62022
Ekziston një lidhje ndërmjet endometriozës dhe iktusit. Ja, cila është ajo
Gratë me një histori të endometriozës kanë më shumë gjasa për të pësuar një iktus krahasuar me ato pa këtë histori. Në këtë përfundim ka arritur një studim i publikuar në Stroke, në të cilin rreziku i pjesëmarrëseve që raportuan endometriozën e konfirmuar nëpërmjet laparoskopisë ishte 34% më i lartë se ai i grave pa një diagnozë të tillë.
"Mjekët duhet të marrin në konsideratë shëndetin e gruas në tërësi, duke i kushtuar vëmendje pranisë së presionit të lartë të gjakut, kolesterolit të lartë dhe faktorëve të tjerë të rrezikut për iktus, si dhe simptomave të lidhura në mënyrë specifike me endometriozën, të tilla si dhimbja e legenit dhe infertiliteti", tha bashkautorja e studimit Stacey A. Missmer nga Universiteti Shtetëror i Miçiganit në SHBA.
Studimi analizoi mbi 112,000 gra (kryesisht të bardha) pjesëmarrëse në Nurses' Health Study II të cilat në vitin 1989 ishin midis 25 dhe 42 vjeç. Pjesëmarrëset u ndoqën deri në vitin 2017. Informacionet e ndryshme për pjesëmarrëset, duke përfshirë një diagnozë të mundshme të endometriozës të konfirmuar me laparoskopi, u morën nëpërmjet pyetësorëve të plotësuar çdo 2 vjet. Studiuesit vëzhguan 893 raste iktusi gjatë 28 viteve të ndjekjes dhe, falë analizave të rregulluara për disa faktorë ngatërrues zbuluan se gratë që kishin raportuar një diagnozë të endometriozës të konfirmuar me laparoskopi (5244) kishin, krahasuar me ato pa këtë gjendje një rrezik 34% më i lartë për iktus (raporti i rrezikut 1.34).
Lidhja ndërmjet endometriozës dhe iktusit u ndërmjetësua 39% nga histerektomia ose ooforektomia dhe 15.5% nga terapia hormonale pas menopauzës. Mosha e menopauzës më pak se 45 vjeç, historia e hipertensionit dhe historia e kolesterolit të lartë përbënin një pjesë mesatare të lidhjes, përkatësisht afërsisht 12%, 8% dhe 5%. Së fundi, nuk u gjetën dallime të rëndësishme në bazë të moshës, historisë së infertilitetit, indeksit të masës trupore ose statusit të menopauzës.
Për studiuesit, të cilët vënë në dukje kufizimet e studimit, duke përfshirë mungesën e të dhënave për llojin e iktusit, këto rezultate do të duhet të përsëriten në grupe më të mëdha gjatësore. Definitivisht , gratë dhe mjekët duhet të dinë historinë gjinekologjike dhe riprodhuese të pacientit, të vlerësojnë faktorët e rrezikut kardiovaskular dhe parandalimin primar të sëmundjeve kardiovaskulare, si dhe shenjat dhe simptomat e sëmundjeve të tilla, përfshirë iktusin.
Stroke 2022. Doi: 10.1161/STROKEAHA.122.039250
https://www.doi.org/10.1161/STROKEAHA.122.039250