qer22022
Long-Covid te fëmijët dhe adoleshentët. Ja, sa janë prekur dhe cilat janë simptomat mbizotëruese
17% e fëmijëve dhe adoleshentëve që kanë pasur Covid shfaqin tre muaj më vonë simptoma të long-Covid, ndër të cilat më të zakonshmet janë kongjestioni nazal, dhimbja e kokës dhe lodhja, ndërsa më e vazhdueshme me kalimin e kohës duket se është pagjumësia.
Këto janë të dhënat që kanë dalë nga studimi i parë perspektiv, i koordinuar nga spitali universitar i Parmës, rezultatet paraprake të të cilit u ilustruan në Kongresin e 77-të të Pediatrisë në Sorrento. Studimi, i cili filloi në nëntor 2021 dhe do të përfundojë në mars 2026, i kryer në 14 qendra, deri më tani ka regjistruar rreth 1000 fëmijë dhe adoleshentë me një infeksion të mëparshëm SARS-CoV-2 me ashpërsi të ndryshme. Për 670 pacientë janë mbledhur tashmë të dhënat e para: 31% kishin një sëmundje të mëparshme, vetëm 1.8% kishin nevojë për shtrim në spital dhe në 15% të rasteve infeksioni ishte asimptomatik.
Pas 3 muajsh, 118 (17,6% e kampionit) shfaqin të paktën një simptomë të long-Covid-it, ndër të cilët 110 (16,4%) manifestojnë të paktën 2 simptoma dhe 84 fëmijë (12%) të paktën 3. Ndër manifestimet më të shpeshta janë: kongjestion nazal (17%), dhimbje koke (15%), lodhje (13%), mungesë oreksi (10%), pagjumësi (9%), kollë e vazhdueshme (8%), dhimbje barku (6%), konfuzion dhe humbje e përqendrimit (5.2%), si dhe skuqje kutane (4.9%).
Ndër fëmijët që ndihen të lodhur (13%), rreth 1 në 4 ndiejnë nevojën për të pushuar më shumë se zakonisht, 19% ndihen më të përgjumur dhe 11% kanë më pak energji se zakonisht. Përsa i përket kohëzgjatjes së simptomave, dhimbjet më të vazhdueshme janë dhimbjet e kokës (10% të fëmijëve vuajnë prej tyre edhe pas 4-6 muajsh) dhe pagjumësia: 3.6% vuajnë prej saj 6 muaj më vonë, 1.8% në 7-9 muaj dhe po aq është përqindja e atyre që vuajnë prej saj një vit më vonë.
"Long-Covid është gjithashtu një problem konkret te fëmijët dhe adoleshentët", specifikon Susanna Esposito, koordinatore e studimit, drejtoreshë e Klinikës Pediatrike të Universitetit të Parmës. "Hulumtimi tregon nevojën për të mos nënvlerësuar simptomat e vazhdueshme që mund të shkaktojnë shqetësim të madh për të vegjlit".