sht92024
Kolesteroli LDL shkakton dëme që në fëmijëri. Ja, cilat janë ato
Ekspozimet e vazhdueshme ndaj niveleve të larta të kolesterolit LDL gjatë fazave fillestare të jetës, përshpejtojnë zhvillimin e pllakave aterosklerotike, edhe kur ngarkesa yndyrore kumulative rezulton e ngjashme me atë të ekspozimeve të zgjatura dhe të vazhdueshme në moshë të përparuar. Këto të dhëna kanë rezultuar nga një studim i publikuar në Nature, i cili sugjeron që menaxhimi i hershëm i hiperlipidemisë mund të jetë thelbësor për parandalimin e sëmundjeve kardiovaskulare në moshë madhore.
Studimi bazohet në eksperimentet e kryera në modelet e minjve, sidomos te ata meshkuj pa receptorë të LDL (Ldlr-/-), të cilët iu nënshtruan një diete të pasur me kolesterol në mënyrë të vazhdueshme ose me ndërprerje. Për të njëjtin kolesterol total të akumuluar, minjtë që iu nënshtruan ekspozimit të ndërprerë në një moshë të hershme (iWD) zhvilluan pllaka aterosklerotike dukshëm më të gjera sesa minjtë që ushqeheshin vazhdimisht me të njëjtën dietë (cWD).
Në studim, u analizuan edhe të dhënat e pjesëmarrësve në Young Finns Study, një grup i madh gjatësor, në të cilin është analizuar lidhja ndërmjet ekspozimit ndaj kolesterolit jo LDL gjatë fëmijërisë dhe adoleshencës dhe zhvillimit të pllakave aterosklerotike në moshë madhore. Rezultatet tregojnë një lidhje të konsiderueshme ndërmjet hiperlipidemisë së parakohshme dhe pranisë së pllakave karotide, pavarësisht nga nivelet lipidike kumulative gjatë jetës. Në veçanti, ekspozimi gjatë fëmijërisë dhe adoleshencës ka kontribuuar në mënyrë të qenësishme në formimin e pllakave në moshë madhore, duke mbështetur hipotezën se menaxhimi i parakohshëm i hiperlipidemisë luan një rol thelbësor në reduktimin afatgjatë të rrezikut kardiovaskular.
"Rezultatet tona theksojnë rëndësinë e një kontrolli optimal të hiperlipidemisë që në fazat e para të jetës, pasi edhe ekspozimet e përkohshme ndaj niveleve të larta të kolesterolit mund të kenë efekte të zgjatura dhe të dëmshme për shëndetin kardiovaskular", përfundon autori kryesor i studimit, Minoru Takaoka.