qer42021
Iktusi. Ja, udhëzimet e reja mbi menaxhimin mjekësor
Kalimi i një iktusi, apo një ataku ishemik kalimtar (TIA) rrit rrezikun e një iktusi në të ardhmen dhe identifikimi i shkakut mund të ndihmojë në krijimin e strategjive specifike parandaluese për të ulur rrezikun e iktuseve të tjera, sipas një udhëzimi të përditësuar nga Shoqata Amerikane e Zemrës/Shoqata Amerikane e Iktusit, botuar në "Stroke". Një rekomandim i ri kërkon që profesionistët e shëndetësisë të kryejnë vlerësime diagnostike për të përcaktuar shkakun e iktusit të parë ose TIA-s brenda 48 orëve nga shfaqja e simptomave dhe udhëzimi përshkruan rekomandimet e trajtimit bazuar në shkakun e iktusit fillestar/TIA. "Ka një rëndësi themelore kuptimi i mënyrave më të mira për të parandaluar një iktus tjetër, pasi ka ndodhur një i tillë", tha Davvn Kleindorfer (Shkolla e Mjekësisë, Universiteti i Miçiganit në Ann Arbor), i cili drejtoi grupin e punës.
Për pacientët që i kanë mbijetuar një iktusi ose TIA-s, udhëzimet rekomandojnë menaxhimin e faktorëve të rrezikut vaskular, veçanërisht hipertensionin, diabetin e tipit 2, kolesterolin, nivelet e triglicerideve dhe pirjen e duhanit, si dhe kufizimin e kripës dhe ndjekjen e një diete mesdhetare dhe, nëse është e mundur, aktivitet aerobik me intensitet të moderuar për të paktën 10 minuta katër herë në javë ose intensitet të fuqishëm për të paktën 20 minuta, dy herë në javë. Dokumenti rekomandon më pas praninë e një ekipi të kujdesit multidisiplinar dhe praktikën e një procesi të përbashkët vendimmarrjeje me pacientin për të zhvilluar plane kujdesi që përfshijnë dëshirat, qëllimet dhe shqetësimet e individit. Ekzaminimi dhe diagnostikimi i fibrilacionit atrial dhe terapia antitrombocitare, janë gjithashtu të nevojshme për pothuajse të gjithë pacientët që nuk kanë kundërindikacione. Në këtë drejtim, ekspertët kujtojnë se kombinimi i antitrombociteve dhe antikoagulantëve zakonisht nuk rekomandohet për të parandaluar iktusin e dytë dhe terapia e dyfishtë antitrombocitare rekomandohet në afat të shkurtër, vetëm për pacientë të veçantë, domethënë për ata me iktus dhe TIA me rrezik të lartë ose stenozë të rëndë simptomatike.
Endarterektomia karotide, heqja kirurgjikale e një obstruksioni ose, në raste të zgjedhura, përdorimi i një stenti në arterien karotide, duhet marrë në konsideratë për pacientët me ngushtim të arterieve në qafë. Menaxhimi mjekësor agresiv i faktorëve të rrezikut dhe terapia anti-trombocitare afatshkurtër janë të preferueshme për pacientët me stenozë të rëndë intrakraniale që besohet të jetë shkaku i iktusit ose TIA-s.
Stroke 2021. Doi: 10.1161/STR.0000000000000375
https://doi.org/10.1161/STR.0000000000000375